Leapmotor мен Xpeng рекорд жасады, Nio мен Huawei құлдырады
Leapmotor қатарынан төртінші ай 100 мыңнан астам көлік жеткізіп отыр, бірақ бір миллиондық жылдық жоспарына әлі 227 мыңға жуық көлік жетпейді.
Фото: CnEVPost
Қытайдың электромобиль өндірушілері 1 қарашада қазан айындағы жеткізілім туралы есеп берді. Leapmotor мен Xpeng жаңа рекорд орнатты: біріншісі клиенттерге 106 127 көлік, екіншісі 50 237 көлік табыстады. Ал Nio мен Huawei HIMA-ның жеткізілімі азайды. Nio 2024 жылғы ақпаннан бері алғаш рет былтырғыдан аз көлік сатты.
Leapmotor жеткізілімі өткен жылдың қазанымен салыстырғанда 50,99%-ға, қыркүйекпен салыстырғанда 0,45%-ға өсті. Компания қатарынан төртінші ай 100 мың көліктен асып отыр. Алайда өсім баяулап келеді: қыркүйекте жылдық өсім 58,51% болған.
Жыл басынан бері Leapmotor 772 666 көлік жеткізді, бұл былтырғыдан 65,88%-ға көп. Яғни бір миллиондық жылдық жоспардың 77,27%-ы орындалды. Жоспарға жету үшін компания қараша мен желтоқсанда айына орта есеппен 113 667 көлік табыстауы керек.
Xpeng пен Xiaomi 50 мыңнан асты
Xpeng бір айда алғаш рет 50 мың көліктен асты. Жеткізілім бір жылда 19,57%-ға, бір айда 21,77%-ға өсті. Марканың бұған дейінгі рекорды 2025 жылғы қазанда орнаған 42 013 көлік еді. Шетелге рекордтық 13 326 көлік жөнелтілді, бұл былтырғыдан 2,7 есе көп әрі барлық жеткізілімнің төрттен бірінен асады.
Дегенмен он айда Xpeng 334 604 көлік сатты, бұл өткен жылдың осы кезеңінен 5,8%-ға аз. Компанияның негізін қалаушы әрі басшысы Хэ Сяопэн төртінші тоқсанда айына 60 мың көліктен асуды мақсат етіп отыр.
Xiaomi Auto нақты санды атамады, тек «50 мыңнан астам» көлік жеткізгенін хабарлады. Бұл марканың 2026 жылғы ең үздік айы. Бұл межеден ол соңғы рет 2025 жылғы желтоқсанда асқан. Жыл басынан бері Xiaomi клиенттерге кемінде 336 490 көлік табыстады, бұл 550 мыңдық жылдық жоспардың шамамен 61%-ы.
Кім ұтылды
Nio 34 246 көлік жеткізді. Бұл былтырғыдан 15,23%-ға, қыркүйектен 8,45%-ға аз. Осылайша компанияның қатарынан 31 ай бойғы өсімі тоқтады. Ең қатты құлдыраған Onvo суббренді болды: 51,66%-ға азайып, 8383 көлікке түсті. Ал Firefly, керісінше, қатарынан екінші ай рекорд жаңартып, 7738 көлікке жетті.
Huawei HIMA-ның жағдайы одан да ауыр. Бұл — Huawei-дің автоөндірушілермен одағы. Оның жеткізілімі бір жылда 50,84%-ға құлап, 33 537 көлікке түсті, ал былтырмен салыстырғанда қатарынан бесінші ай азайып келеді. Li Auto 29 025 көлік табыстады, бұл бір жылда 8,63%-ға аз. Компания 28 қазанда жаңартылған Li i6-ны шығарды, ал қарашада өндірістік қуатын айына 20 мың көлікке жеткізуді жоспарлап отыр.
Geely-дің премиум маркасы Zeekr бір жылда 51,63%-ға өсіп, 32 483 көлікке жетті, бірақ қыркүйекпен салыстырғанда 12,72%-ға азайды. Сөйтіп қатарынан алты ай жаңарған рекордтар тізбегі үзілді. 2021 жылдан бері Zeekr клиенттерге 963 776 көлік табыстады, миллионға дейін 36 224 көлік қалды. Қазақстанда марканы Orbis Auto сатады, ол жыл соңына дейін Zeekr 9X флагман кроссоверін әкелуге уәде берген.
Тізімдегі ең көп көлікті SAIC-GM-Wuling сатты: 142 757 көлік, оның 99 958-і электромобиль мен гибрид. Өндірушілер қараша қорытындысын желтоқсанның басында жариялайды. Сол кезде Leapmotor мен Xiaomi жылдық жоспарын орындай ала ма, жоқ па, белгілі болады.
Дереккөздер: CnEVPost — Қытай автоөндірушілерінің 2026 жылғы қазандағы жеткізілімі
