ЖИ бумы $100-дан арзан смартфондарды ығыстырып жатыр
Counterpoint сарапшысы бюджеттік телефонның шегі $150-дан $250-ге, тіпті $300-ге дейін жылжуы мүмкін деп санайды.
Изображение: Rest of World / iStock
Жасанды интеллект бумы арзан смартфондарды нарықтан ығыстырып жатыр. Rest of World хабарлауынша, 2026 жылдың екінші тоқсанында $100-дан арзан телефондардың әлемдік жөнелтілімі былтырмен салыстырғанда шамамен 60%-ға азайды. Жад өндірушілері дата-орталықтарға бет бұрды, сондықтан бюджеттік модельдерге микросхема жетпей қалды.
Бүкіл нарыққа жадты үш компания шығарады: Samsung Electronics, SK Hynix және Micron. Әлемдік өндірістің 90%-дан астамы солардың үлесінде. «2025 жылдың соңында үшеуі де жеткізілімнің басым бөлігін тұтынушылық электроникадан ЖИ орталықтарына бұрды», — деді IDC-дің мобильді құрылғыларды зерттеу жөніндегі директоры Рамон Льямас.
Бигтехтің сұранысы әлі өсіп келеді. Америкалық гиперскейлерлердің, яғни ең ірі бұлт пен дата-орталық иелерінің күрделі шығыны 2025 жылы $470 млрд, 2026 жылы $870 млрд, ал 2027 жылы $1,3 трлн болады деп бағаланады.
Баға қалай өсіп жатыр
Басылым келтірген деректерге қарағанда, сатылымдағы смартфондар 2026 жылы орта есеппен 15%-ға қымбаттады. Жаңа модельдер былтырғыдан шамамен 25%-ға қымбат. Баға ең көп өскен өңірлер — Үндістан (21%), Азия-Тынық мұхиты өңірі (19%), Таяу Шығыс пен Африка (18%). АҚШ-та өсім 5% болды.
Ең көп зардап шеккен — әлемдік жеткізілімнің 60%-ға жуығы тиесілі қытай брендтері. Xiaomi желтоқсаннан маусымға дейін Үндістанда Redmi 15C бағасын $140-дан $190-ға көтерді, яғни 36%-ға. Oppo-ның Оңтүстік-Шығыс Азиядағы $100-дан арзан смартфондар жөнелтілімі 96%-ға құлдырады. Vivo көп елде бастапқы моделінің бағасын $100-дан асырды.
2025 жылы әр төрт смартфонның бірінен астамы $150-дан арзан болатын, ал $100-дан арзан модельдер 173 млн дана сатылған. Counterpoint Research аға сарапшысы Айвен Лам өндірушілер бастапқы деңгейдегі жобаларды «күрт қысқартты» дейді. «Бұрын $150-дан арзан тұрған құрылғы енді $250-ден, тіпті $300-ден арзан болуы мүмкін», — дейді ол.
Орта сыныпты модельдер де қымбаттап жатыр
Жад тапшылығы ең арзан телефондарға ғана әсер етіп отырған жоқ. 2 қазанда Google АҚШ-та Pixel 10a бағасын $100-ға көтерді: 128 ГБ нұсқасы енді $499 емес, $599 тұрады. Компания бағаның өсуіне ресми түсініктеме берген жоқ, бірақ 9to5Google мұны жадтың қымбаттауымен байланыстырады. Сол аптада Samsung АҚШ-тағы бірнеше Galaxy моделінің бағасын көтерді, ал бұған дейін Galaxy S26 бағасын қымбаттатқан еді.
Мұның ауыртпалығы ең алдымен табысы аз сатып алушыларға түседі. GSMA дерегінше, халықтың ең кедей 20%-ы үшін бастапқы смартфон айлық табыстың 44%-ына тең, ал Сахарадан оңтүстіктегі Африкада бұл көрсеткіш 76%. GSMA 2030 жылға қарай мобильді интернетті тағы 800 млн адам қолдана бастайды деп күткен. «Смартфондар сатылымда қалып, бірақ қолжетімсіз болып кетсе, адамдар желіде қалу үшін ауыр құрбандыққа баруға мәжбүр», — деді GSMA Foundation-ның цифрлық қолжетімділік бағытының басшысы Клэр Сибторп. Зерттеуде Қазақстан бойынша жеке дерек жоқ.
Дереккөздер: Rest of World — ЖИ бумы арзан смартфондарды қалай жойып жатыр, 9to5Google — Pixel 10a қымбаттады
