Meta Quest 2 мен Quest Pro-ны 2027 жылы жаңартуды тоқтатады
Бұл гарнитураларға жаңа қосымшаларды дүкен 2027 жылғы желтоқсанға дейін қабылдайды, қауіпсіздік патчтары да сол жылдың соңына дейін шығады.
Фото: 9to5Google
Meta компаниясы Quest 2 мен Quest Pro операциялық жүйенің соңғы жаңартуын 2027 жылдың басында алатынын хабарлады. Horizon OS 2.13 қаңтарда шыға бастайды, ал наурызға қарай барлық құрылғыға жетеді. Одан кейін жаңа функциялар тек Quest 3, Quest 3S және одан жаңа үлгілерде пайда болады.
Гарнитуралар пайдасыз бола қалмайды. Тоқсан сайынғы қауіпсіздік патчтары мен маңызды қателерді түзету 2027 жылдың соңына дейін жалғасады. Сатып алынған ойындар жұмыс істей береді, жаңаларын да сатып алып жүктеуге болады. Quest 3 және 3S иелерімен мультиплеер де сақталады.
Әзірлеушілер үшін не өзгереді
Бұл құрылғыларға қолдау көрсетілетін соңғы SDK нұсқасы v213 болады. Quest 2 мен Quest Pro-ға жаңа қосымшаларды дүкен тек 2027 жылғы желтоқсанға дейін қабылдайды. Шығып қойғандарын жаңарта беруге болады, алайда Meta жүйе мен SDK-ның жаңа нұсқаларын ескі гарнитураларда тексермейді.
Әзірлеуші қолдауды тоқтатса және пайдаланушы контентке немесе маңызды сервистерге қолжетімділігінен айырылса, оларды кемінде 180 күн бұрын ескертуі керек. 9to5Google шолушысының пікірінше, ойындарға қолдау 2028 жылғы қаңтардан кейін тез азаяды. Бұл Meta мәлімдемесі емес, оның болжамы.
Екі үлгінің тағдыры
Quest 2 2020 жылғы қазанда $300-ға шықты және шамамен 20 млн данамен ең көп сатылған VR-гарнитура атанды. Quest Pro 2022 жылғы қазанда $1500-ге шығып, төрт айдан кейін $1000-ға арзандады, бірақ коммерциялық тұрғыдан сәтсіз болды. Екеуінде де бір чипсет бар.
Иелеріне жаңа үлгілерге көшу қалады: Quest 3 — $599, Quest 3S — $349. 2027 жылдың көктемінде Meta $1300 тұратын VR-көзілдірік шығарады. Қазақстандағы сатылым туралы компания хабарламаған. Компания туралы Meta досьесінен оқыңыз.
Дереккөздер: UploadVR — қолдау мерзімі мен шарттары туралы, 9to5Google — соңғы жаңартулар туралы, Meta — әзірлеушілерге хабарлама
