Koenigsegg АҚШ-тағы жеті CC850-нің бәрін кері шақырады
Оған 12 қазандағы оқиға себеп болды: моторы сөндірілмеген, артқы берілісі қосулы тұрған гиперкар жүргізушісіз жылжып кеткен.
Фото: John Keeble / Getty Images
Koenigsegg АҚШ-қа жеткізілген жеті CC850 гиперкарының бәрін кері шақырады. Қозғалтқыш жұмыс істеп, беріліс қорабы артқы жүрісте тұрса, бұл көліктердің электронды тұрақ тежегіші қосылмайды. Ақауды тегін қашықтан жаңарту арқылы түзетеді. Мұны Carscoops келтірген америкалық NHTSA реттеушісінің хабарламасы көрсетеді. Басылымның бағалауынша, әр көліктің құны шамамен $3,6 млн.
Кері шақыруға АҚШ-тағы бір оқиға түрткі болды. NHTSA дерегінше, 12 қазанда Koenigsegg-ке CC850 өздігінен жылжып кеткені туралы хабар түскен. Жүргізуші қозғалтқышты сөндірмей, артқы берілісті қосулы қалдырып, көліктен түсіп кеткен. Шығын болған-болмағаны хабарламада айтылмаған.
Компания жүйені бір апта бойы өз сынағында тексерді. Сөйтсе, R режимінде мотор жұмыс істеп тұрғанда тежегіш батырманы жай басқаннан қосылмайды екен. Оны тек батырманы үнемі басып ұстап тұрып қана іске қосуға болады. NHTSA мұндай жағдай тұрақ тежегішінің стандартты статикалық сынағына кірмейтінін атап өтті. Сондықтан кері шақыру ерікті болса керек: реттеуші федералдық қауіпсіздік стандарттарының бұзылғанын анықтаған жоқ.
Кері шақыруға 2025 жылғы 28 қыркүйек пен 2026 жылғы 2 тамыз аралығында шыққан көліктер ілікті. Жаңарту қашықтан орнатылады. Одан бас тартқан иесі Koenigsegg-тің ресми дилеріне барса, бағдарламаны сол жерде орнатып береді.
CC850-нің басты ерекшелігі де трансмиссиясында. Үш білікті, жеті ілініс муфтасы бар тоғыз сатылы Lightspeed қорабы көлікті механика секілді, ілініс педалі мен ойығы бар иінтірекпен де, кәдімгі автомат секілді де жүргізуге мүмкіндік береді. Энгельхольмдағы Koenigsegg швед маркасы көліктеріне қозғалтқыш пен беріліс қорабын өзі жасайды.
Дереккөздер: Carscoops — АҚШ-тағы Koenigsegg CC850 көліктерін кері шақыру
