Норвегия ақылды көзілдірікке уақытша тыйым салмақ
Тыйым ауруханаларға, мектептерге, балалар алаңдарына және киім ауыстыратын бөлмесі бар фитнес-клубтарға қатысты болуы мүмкін, ал ықтимал аймақтар тізімінде жағажай, мұражай мен сауда орталықтары да бар.
Фото: Джефф Чиу / AP
Норвегия үкіметі камерасы мен ЖИ-і бар ақылды көзілдірікке бірқатар қоғамдық орындарда уақытша тыйым салуды ұсынды. Заң жобасын үкімет ел парламенті стортингке «мүмкіндігінше тезірек» енгізбек. Билік мұны жеке өмірге төнетін қауіппен түсіндіреді, себебі мұндай көзілдірікпен айналадағыларды байқатпай түсіруге болады.
Тыйым медициналық мекемелерде, киім ауыстыратын бөлмесі мен душы бар фитнес-клубтарда, мектептерде, балабақшаларда, балалар алаңдарында және жастар клубтарында қолданылуы тиіс. Үкімет концерттерді, спорт іс-шараларын, саябақтарды, жағажайларды, мұражайларды және сауда орталықтарын да қарастырып жатыр. Уақытша тыйымның қанша уақытқа созылатыны әзірге айтылмады.
Билік толық тыйым ұсынып отырған жоқ. Көзілдірікті жеке өмірде және жекелеген жағдайларда пайдалана беруге болады. Ал осал топтар үшін үкімет «қоғамға пайдалы» қолданыс сақталуы үшін ерекше жағдайларды талқылап жатыр.
Кім қалай қарады
Privacy International құқық қорғау ұйымынан Адам Смит бастаманы «бигтехтің барған сайын көбірек дерек сорып алуға деген ашкөз әрекеттерінен көптен күткен қорғаныс» деп атады. Ray-Ban-мен бірге ақылды көзілдірік шығаратын Meta пайдаланушыларды «адамдардың қалауын құрметтеуге» шақырды. Компания көзілдірікте жазу индикаторы бар екенін еске салды, оны жауып тастаса немесе бүлдірсе, түсірілім өшіп қалады.
Норвегия бұл тақырыпқа жаздан бері келе жатыр. Тамызда цифрландыру және мемлекеттік басқару министрі Карианне Тунг ақылды көзілдірікті қазіргіден қатаңырақ реттеуге уәде берді. Ол қоғамдық орындарда бет-әлпетті тану функцияларына тыйым салу мүмкіндігін де жоққа шығармады. Ережелерді әзірлеу үшін үкімет сарапшылар тобын жинады.
Тек Норвегия емес
Ақылды көзілдірікке қысым басқа елдерде де күшейіп келеді. Нидерландтық Hans Anders оптика желісі ережелер нақтыланғанша Ray-Ban Meta сатуды тоқтатты. Ұлыбританияда Кинотеатрлар қауымдастығы жеке өмірге қауіп пен қарақшылыққа байланысты камерасы бар көзілдірікпен кіруді шектеді. Ал Калифорнияда, керісінше, губернатор мұндай көзілдірікпен жеке үй-жайларда жазуды шектейтін заңға вето қойды.
Дереккөздер: AP — Норвегия ақылды көзілдірікке уақытша тыйым салуға ұмтылып отыр, Норвегия үкіметі — Карианне Тунг ақылды көзілдірікті реттеу туралы
