Netflix 1000-ға жуық қызметкерін қысқартады
Жыл басында компания Warner Bros. Discovery үшін таласта Paramount Skydance-ке жеңілді, ал көрерменнің уақытын YouTube пен TikTok тартып алып жатыр.
Фото: TechCrunch / Netflix
Netflix штатының шамамен 6%-ын, яғни 1000-ға жуық адамды жұмыстан шығарады. Бұл туралы 14 қазанда ішкі хатқа сілтеме жасап, алғаш The Wall Street Journal жазды. Компания бұл санды TechCrunch-қа растады.
Қысқарту ең алдымен өнім мен технология командаларына, заңгерлер мен кадр бөліміне тиеді. Басқа мәлімет жарияланған жоқ. АҚШ Бағалы қағаздар жөніндегі комиссиясына берілген жылдық есепке қарағанда, 2025 жылдың соңында Netflix-те толық ставкада 16 мың адам жұмыс істеген.
Хатқа компанияның екі бас директоры Тед Сарандос пен Грег Питерс қол қойды. Олар Netflix-тің «әлемді көңілдендіру» миссиясын өршіл мақсат деп атады. Ал оны орындау үшін адам мен ресурсты тәртіппен бөлу керек екенін жазды. Компания маңызды бағыттарға «батыл инвестиция салуды» жалғастыратынын және жылдық болжамды орындап келе жатқанын айтты.
Қысқарту сәтсіз мәміледен кейін басталды. 2026 жылдың басында Netflix Warner Bros. Discovery-дің студиялары мен стримингі, соның ішінде HBO үшін ұзақ таласта Paramount Skydance-ке жол берді. Сонымен бірге көрерменнің назары үшін бәсеке күшейіп жатыр. TechCrunch келтірген зерттеушілер дерегіне сай, TikTok тартымдылық жағынан Netflix-ті қуып жетіп келеді. Ал YouTube 2025 жылы күнделікті орташа көру уақыты бойынша одан озып кетті.
Сондықтан компания бағаны көтерді, жарнамалы тарифті кеңейтті, спорт, тікелей эфир, ойындар, бейнеподкастар мен қысқа тік роликтер қосты. 2025 жылы Netflix түсімі $45,2 млрд болды, жарнамадан түскен табыс $1,5 млрд-тан асты. Компанияның тарихы мен Warner Bros. үшін күресі Netflix досьесінде жазылған.
Дереккөздер: TechCrunch — Netflix 1000 қызметкерді қысқартуы туралы, The Wall Street Journal — басшылықтың хаты туралы, SEC — Netflix-тің 2025 жылғы жылдық есебі
