Google Constellation-нан 3,6 ГВт электр қуатын алады
Constellation 11 реакторды жаңғыртуға $4,3 млрд-тан астам қаржы салады, алғашқысы қосымша қуатты 2028 жылға қарай береді.
Фото: Constellation
Google пен АҚШ-тағы ең ірі атом станцияларының операторы Constellation Energy 6 қазанда электр энергиясын жеткізу туралы екі ұзақмерзімді келісімге қол қойды. Жалпы көлемі 3590 МВт, яғни шамамен 3,6 ГВт. Бұл қуат Google-дың сервистері мен ЖИ модельдері жұмыс істейтін дата-орталықтарға керек.
Келісімнің бірінші бөлігі 890 МВт жаңа атом қуатына арналған, мерзімі 20 жыл. Constellation бұл үшін жаңа станция салмайды. Компания Иллинойс, Пенсильвания және Нью-Джерси штаттарындағы 11 энергоблокты жаңғыртады. Мұндай жұмысты uprate деп атайды: жабдық ауыстырылған соң реактор бұрынғыдан көп энергия береді. Алғашқы жаңартылған блок 2028 жылға қарай жоғары қуатпен іске қосылуы тиіс.
Екінші бөлігі – Constellation-ның қазір жұмыс істеп тұрған станцияларынан 2700 МВт жеткізу туралы 15 жылдық келісім. Компания жобаға $4,3 млрд-тан астам қаржы салады. Оның есебінше, келісім 4400 жұмыс орнын сақтап, құрылыс кезінде 7200 уақытша жұмыс орнын ашады.
Барлық энергия PJM желісіне түседі. Бұл – АҚШ-тағы ең ірі энергожүйе, ол 13 штатты қамтиды. Дата-орталықтардың көбеюі желіге дәл осы өңірде қатты салмақ түсіріп отыр. Сондықтан PJM операторы дата-орталық иелерін өз генерациясын әкелуге міндеттеуді ұсынған. Әйтпесе ең жоғары жүктеме сағаттарында оларды өшіріп тастауы мүмкін.
«Біз жауапкершілікпен өсуге ұмтыламыз. Сондықтан ел энергожүйесіне жаңа қуат қосатын таза әрі сенімді энергияға инвестиция саламыз», – деді Google-дың энергетика жөніндегі жаһандық басшысы Аманда Питерсон Корио. Constellation директорлар кеңесінің төрағасы әрі бас директоры Джо Домингестің сөзінше, жұмыс істеп тұрған АЭС-тердің өндірісін сақтап, арттыру АҚШ-тың өсіп келе жатқан энергия қажеттілігі үшін өте маңызды.
Электрден бөлек, компаниялар технологиялық одақты бес жылға кеңейтті. Constellation Google Cloud пен Gemini Enterprise-ты жаңа қуатты тезірек қосу, өндірісті оңтайландыру және маңызды инфрақұрылымды қорғау үшін пайдаланады.
Бұл келісім бигтехтің атом энергиясы үшін бәсекесін жалғастырады. Constellation бұған дейін Microsoft үшін Three Mile Island станциясын қайта іске қосуға келіскен, ал Google NextEra Energy компаниясының Айовадағы АЭС-ін қайта қосу туралы келісімшарт жасаған. Жаңа келісім бойынша алғашқы блокты жаңғырту 2028 жылы аяқталуы тиіс.
Дереккөздер: Constellation – Google-мен келісім туралы баспасөз релизі, BNN Bloomberg – PJM желісі мен контекст туралы
