Ford Fathom электр пикабына 5000 ірі құйма бөлшек жасады
Әр пикапта екі алюминий құйма 146 бөлшектің орнын басады, ал АҚШ-та Fathom $30 000-нан арзан тұрады.
Фото: Ford
Ford болашақ Fathom электр пикабы үшін 5000-нан астам ірі құйма бөлшек жасады. Бұл шамамен 2500 көлікке жетеді. Әр пикапқа алдыңғы және артқы екі құйма қойылады, олар 146 жеке бөлшектің орнын басады. Бұл туралы Ford блогында компанияның кузов құрылымының перспективалы архитектурасы жөніндегі бас инженері Владимир Богачук айтты.
Ford мұндай бөлшектерді «уникастинг» деп атайды. Бұл Tesla гигакастинг деген атпен танымал еткен тәсіл. Шанақтың штамптап, дәнекерленетін ондаған элементінің орнына көлікке бір үлкен алюминий құйма орнатылады.
Құймалар қалай жасалып, тексеріледі
Бөлшектерді Ford-тың Шелбивиллдегі техникалық орталығында құяды. Алюминий құймаларын шамамен 700°C-та балқытып, шанақтың алдыңғы не артқы бөлігінің қалыбына қысыммен құяды. Содан кейін әр партия бірнеше кезеңнен өтеді:
- температурасы тұрақты бөлмеде геометриясы өлшенеді;
- өнеркәсіптік рентген кеуек пен қуыс іздейді;
- беті оптикалық сканермен тексеріледі;
- зертханада созылуға және химиялық құрамға сынақ жасалады.
Барлық тексерістен өтпейінше, партия ары қарай жіберілмейді. Ford-тың айтуынша, инженерлер құю циклінің уақытын да қысқартып жатыр. Сондай-ақ құймаларды бөліп жөндеуге болатындай етіп жобалайды.
Дайын бөлшектер Кентукки штатындағы Ford-тың Луисвилл зауытына жеткізіледі. Онда үдерісті пысықтап, прототиптер құрастырады. Зауыт Fathom мен жаңа Universal EV платформасындағы басқа көліктерге қайта жабдықталып жатыр. Конвейер үш тармаққа бөлінеді: алдыңғы бөлік, артқы бөлік және салон еденімен бірге батарея. Оларды ең соңында біріктіреді. Ford құрастыру қазіргіден 40%-ға дейін жылдам болады деп уәде етеді.
Пикап туралы не белгілі
Fathom — бес орындық шағын электр пикабы. Ford электромобиль саласындағы жаңа үмітін осы көлікке артып отыр. Electrek оның бағасын $28 350, Carscoops $29 945 деп көрсетеді, екі жағдайда да бұл $30 000-нан арзан. Carscoops дерегінше, жолаушыларға арналған орын Toyota RAV4-тен көп. Көлік 97 км/сағ-қа шамамен 4,5 секундта жетеді, ал батареясы энергияны кері бере алады. Батарея сыйымдылығын, жүріс қорын және сыртқы түрін Ford әлі жарияламады.
Фримонт зауытында гигапресті 2020 жылы алғаш Tesla орнатты. Компания Model Y-тің артқы бөлігін 70 бөлшектің орнына тұтас құя бастады. Ұқсас технологияны Volvo, Xiaomi және Xpeng қолданып жүр, ал Toyota, Honda мен Hyundai өз желілерін әзірлеп жатыр. Stellantis гигакастингке қаржы салмайтынын айтқан.
Carscoops дерегінше, Fathom-ның ресми тұсаукесері 2027 жылдың көктемінде өтеді. Пикаптың Қазақстанда сатылатыны ресми жарияланған жоқ. Ford бұл модельге неге көп үміт артатынын Ford досьесінен оқыңыз.
Дереккөздер: Electrek — Ford ірі құймаға көшеді, Carscoops — Ford Fathom туралы не белгілі
