Chery Tiggo 2 Latin NCAP краш-тестінде нөл жұлдыз алды
Маңдайдан соқтығысу кезінде көліктің өртену қаупі анықталды, ал ересектер мен балаларды қорғау 0%-ға бағаланды.
Фото: Latin NCAP
Латын Америкасының Latin NCAP краш-тест бағдарламасы 28 қазанда Chery Tiggo 2-ге бес жұлдыздың біреуін де бермеді. Бұл 2026 жылғы жаңартылған хаттамалар бойынша шыққан алғашқы нәтиже. Баға Латын Америкасында сатылатын, Қытайда шығарылған Tiggo 2, Tiggo 2 Pro және Tiggo 2 Pro Max үлгілеріне, сондай-ақ олардың Мексикадағы нұсқасы Chirey Tiggo 2 Pro-ға қойылды.
Сынақ нені көрсетті
Ересек жолаушыларды да, балаларды да қорғау 0% деп бағаланды. Жаяу жүргіншілер мен жолдағы өзге осал қатысушылардың қауіпсіздігі үшін көлік 48,89%, белсенді қауіпсіздік жүйелері үшін 45,45% жинады.
Маңдайдан соқтығысқанда шанақ тұрақсыз болып шықты. Latin NCAP бағасынша, ол бұдан үлкен жүктемеге төтеп бере алмайды. Жүргізушінің кеудесі нашар қорғалған. Оның үстіне маңдайдан соқтығысу сынағында өрт шығу қаупі байқалды, сондықтан ересектерді қорғау бағасы толық нөлге түсірілді. Маңдай соққысында көлік 16 ұпайдың бірін де ала алмады, ал бағанға бүйірден соғу сынағы мүлде өткізілмеді, себебі көлікте қауіпсіздік перделері жоқ.
Он жасар бала манекенінің мойны мен басына маңдай соққысында үлкен жүктеме түсті. Үш жасар манекеннің басы бүйір соққысында қорғаныс аймағынан шығып кетті, яғни орындықтан ұшып кету қаупі туды. Балалар орындығының бекіткіштері де тексеруден өтпеді. Артқы орындықтарда белдіктің алдын ала тартқыштары мен күш шектегіштері жоқ. Өндіруші артқы қатардағы бойы аласа ересек әйелді көлік қорғайтынын дәлелдей алмады.
Сынақтан өткен нұсқада төрт қауіпсіздік жастығы мен ESC тұрақтандыру жүйесі бар. Ал жүргізушіге көмектесетін жүйелер, оның ішінде автоматты тежеу, қосымша ақыға да орнатылмайды.
Latin NCAP пікірі
Latin NCAP бас хатшысы Алехандро Фурастың айтуынша, өңірдегі маркалардың көбі қауіпсіздіктің жаңа талаптарына ілесіп келеді, бірақ Tiggo 2 олардың қатарында жоқ. «Бұл өңірімізде сұранысы жоғары сегменттегі көліктің қауіпсіздігі соншалық төмен болғаны үшін Chery-ді назардың ортасына қояды», — деді ол.
Latin NCAP кеңесінің төрағасы Стефан Бродзяк нәтижені «өкінішті әрі тұтынушыларды қорлайтын» деп атады. «Chery бұл елеулі кемшіліктерді тез арада жойып, жақсарғанын тәуелсіз сынақпен дәлелдеуі керек», — деді ол.
Қазақстандағы көліктер
Қазақстанда Алматыда құрастырылатын Chery Tiggo 2 Pro сатылады. Latin NCAP бұл нұсқаны сынаған жоқ, сондықтан нәтижені оған тікелей теліуге болмайды. Алайда біз Tiggo 2 Pro шолуында жазғандай, отандық көлікте небәрі екі қауіпсіздік жастығы бар, ал прайс бойынша бағасы 6,49 млн теңге.
Дереккөздер: Latin NCAP — Chery Tiggo 2 нәтижесі туралы баспасөз хабарламасы, Latin NCAP — сынақ хаттамасы, CarNewsChina — Tiggo 2 краш-тесті туралы
