Пластикалық хирургтар орта есеппен 2,1 млн теңге алады

Қазақстандағы пластикалық хирургтар 2026 жылғы сәуірде айына орта есеппен 2,1 млн теңге алған. Бұл 180-нен астам медициналық мамандықтың ішіндегі екінші көрсеткіш. Ұлттық статистика бюросының іріктемелі зерттеуін Data Hub келтірді, ал деректерді Kursiv жариялады.

Бірінші орында бет-жақ хирургтары тұр. Олардың орташа есептелген жалақысы 2,4 млн теңге. 2 млн-нан тек осы екі мамандық асты. Үшінші орында 1,3 млн теңгемен цитопатологтар тұр.

Алғашқы ондыққа жедел медициналық көмек пен апат медицинасы дәрігерлері, комбустиологтар, кардиологтар, рентгенхирургтар, кардиохирургтар мен ангиохирургтар да кірді. Олардың орташа жалақысы 729 мыңнан 864 мың теңгеге дейін.

Бір жыл бұрын рейтинг басқаша еді. 2025 жылы шамамен 1 млн теңгемен кардиохирургтар көш бастаған. Ал пластикалық және бет-жақ хирургтары алғашқы жүздікке де ілікпеген, олардың орташа жалақысы 500 мың теңгеден аспаған.

Data Hub мұндай секірістерді іріктеменің құрылымымен түсіндіреді. Бюро денсаулық сақтау мен әлеуметтік қызмет саласындағы барлық ірі ұйымды және орта мен шағын ұйымдардың бір бөлігін сұрады. Алайда шағын кәсіпкерлік субъектілері зерттеуге кірмеген. Штат неғұрлым көп болса, сауалнама қызметкерлердің соғұрлым аз үлесін қамтиды. Мысалы, 5000 адам істейтін ұйымда әр жүзінші қызметкер ғана сұралады.

Бұған дейін rizz.kz Қазақстанда 300 мың теңгеден көп алатындар үлесі 58,4%-ға жеткенін жазған.

Дереккөздер: Kursiv — Ұлттық статистика бюросының дерегі бойынша дәрігерлердің жалақысы