Хакерлер GitHub-тан Meta кодын және 1500 адам дерегін ұрлады

Meta шамамен 1500 адамға олардың жеке деректері хакерлердің қолына түскенін хабарлап жатыр. Бөгде топ қызметкердің ұрланған есептік деректерімен компанияның GitHub-тағы бірқатар репозиторийіне кірген. Сол жерден бағдарлама коды мен жеке ақпаратты алып кеткен. Оқиға туралы SecurityWeek жазды, Meta жылыстауды растады.

Компанияның айтуынша, ұрланғанның 99%-ы — іскерлік деректер, яғни оның кейбір өнімдеріне қатысты код. Қалған 1%-ы — ішкі ережеге қайшы, қателікпен репозиторийге түсіп кеткен жеке мәліметтер. Нақты қандай дерек жылыстағанын Meta айтпайды. Зардап шеккендердің көбі — компанияның АҚШ-тағы қызметкерлері.

Жеке ақпаратқа ұқсайтын деректің бір бөлігі синтетикалық немесе иесіздендірілген тест ақпараты болып шықты. Сондықтан Meta шабуылдаушылар нақты жазбаны тест жазбасынан ажырата алмауы мүмкін деп есептейді. Бұзу бірнеше апта бұрын анықталған, ал хабарламалар 13 қазанда, сейсенбіде жіберіле бастады.

«Бұл Meta өнімдерінің ешқайсысындағы осалдық емес, Meta-ның ішкі жүйелері бұзылған жоқ», — деді компания өкілі. Оның сөзінше, GitHub репозиторийіндегі іскерлік деректерге қызметкердің ұрланған есептік деректері арқылы заңсыз қол жеткізілген. Meta GitHub-пен бірге жүргізген тергеу нәтижесінде хакерлер дәл оның деректерін нысанаға алмаған деп санайды.

Meta-ның қауіпсіздік қызметі шабуылдаушылардың қолжетімділігін жауып, GitHub пен құқық қорғау органдарын тартты. Компания зардап шеккен репозиторийлерден табылған құпия кілттерді ауыстырды және реттеушілерге хабарлап жатыр. Зардап шеккендерге кредит тарихы мен даркнетті тегін бақылау ұсынылады.

Сонымен қатар Meta GitHub-та жұмыс істейтін командалармен бірге пайдаланушы деректерін платформадан алып тастап жатыр. Қателікпен жүктелген жеке мәліметті табу үшін автоматты сканерлеу де енгізіледі. Хакерлер тобының атауын компания ашпады. Meta империясы қалай құрылғанын біздің досьеден оқыңыз.

Дереккөздер: SecurityWeek — GitHub арқылы Meta коды мен деректерінің жылыстауы