Toyota жаңа моторларын басқа маркаларға сатпақ
Компания бұдан жылына шамамен $1,7 млрд табуды көздейді, ал жаңа буын қозғалтқыштар көліктерге 2027 жылы-ақ орнатыла бастайды.
Фото: Toyota
Toyota жаңа буын қозғалтқыштары мен гибридті жүйелерін басқа автоөндірушілерге сатпақ. Automotive News дерегінше, компания бұл бизнестен жылына шамамен $1,7 млрд табуды көздейді. Стратегияны инвесторларға Еуропадағы технологиялық семинарда Toyota-ның техникалық директоры Хироки Накадзима таныстырды.
Сөз Toyota 2024 жылы алғаш көрсеткен моторлар туралы болып отыр. Бұл топқа 1,5 литрлік қатар орналасқан төрт цилиндрлі қозғалтқыш пен турбинасы бар 2,0 литрлік төрт цилиндрлі қозғалтқыш кіреді. Екеуі де бұрынғыларынан ықшам, үнемді әрі қуатты. Оларды кәдімгі гибридті жүйемен де, розеткадан зарядталатын гибридпен де қосуға болады. Жаңа моторлар нарыққа 2027 жылы шығады.
Жаңа қозғалтқыштар қазіргілерінен қысқа әрі жіңішке. Сондықтан оларды электромобильдерге арнап сызылатын аласа капот астына орналастыру оңай, ал бір модельді бензин, гибрид немесе толық электр жетегімен шығаруға болады. Осы себепті Toyota моторлар басқа маркалардың платформасына да оңай орнайды деп есептейді.
Компанияның мұндай жеткізілімде тәжірибесі бар. Еуропада Toyota Mazda CX-50 мен Mazda2 үшін гибридті қондырғы жеткізеді, Subaru одан өз гибридті жүйесіне электр бөлшектерін алады, ал Suzuki Toyota-ның бірнеше күш агрегатын пайдаланады. Жапон концерні осы маркалармен және Daihatsu-мен одақ құрған, әрі олардың капиталында үлесі бар.
Жаңа буын моторларын кім сатып алатынын Toyota әлі айтқан жоқ. Ecomento басылымының бағасынша, жоспардың Еуропадағы шарада жариялануы технологияны еуропалық өндірушілерге де сатқысы келетінін аңғартады. Toyota-ның басты мақсаты — серіктестер арқылы шығарылым көлемін арттырып, ауқым әсерін алу.
Дереккөздер: Ecomento — Toyota моторларды сату жоспары туралы, Automotive News-ке сілтемемен, Automotive News — Toyota моторлар сатудан жылына $1,7 млрд күтеді
