Tesla Шанхайда жиналған 131 мың Model 3-ті кері шақырды
Ақау қашықтан жөнделеді: түзетілген бағдарлама 2026.26.100.2 және 2026.32.3 нұсқаларында бар.
Фото: Tesla
Tesla Шанхай зауытында құрастырылған 131 726 Model 3 Premium седанын кері шақырды. Себебі қауіпсіздік жастығының баптауында: бүйірден соққы болғанда ол жүргізушінің иығына рұқсат етілгеннен артық салмақ түсіруі мүмкін. Бұл туралы 20 қазанда Еуропаның қауіпті тауарлар туралы хабарлау жүйесі Safety Gate жариялады.
Кері шақыру 2024 жылғы 30 маусым мен 2026 жылғы 8 мамыр аралығында шыққан сол жақ рульді Premium көліктеріне қатысты. Олар Еуропалық одақта, Таяу Шығыста және Оңтүстік Кореяда сатылған. Нарықтар тізімінде Қазақстан жоқ.
Жастықтың ақауы неде
Мәселе алыс жақтағы қауіпсіздік жастығына (far-side airbag) байланысты. Tesla артық жүктеме жастықтың іске қосылу алгоритмінің бағдарламалық баптауынан туындайтынын анықтады.
Ақау БҰҰ-ның R135 ережесі бойынша бағанаға соғу сынағында байқалды. Көлікті 32 км/сағ жылдамдыққа дейін үдетіп, жүргізуші есігімен бағанаға соғады, ал жүргізуші орнында WorldSID манекені отырады. Кері шақырылған көліктерде иыққа түсетін бүйірлік күш рұқсат етілген 3,0 кН-нан асып кетуі мүмкін.
Қалай жөндейді
Сервиске барудың қажеті жоқ. Tesla бағдарламаны қашықтан жаңартады, содан кейін жастық басқаша ашылады. Түзетілген баптау 2026.26.100.2, 2026.32.3 және одан кейінгі нұсқаларда бар.
Науқанның нөмірі — SB-26-00-006. Иелері көлігін сервистік код арқылы тексере алады. S012600006 коды жаңарту керек емес екенін білдіреді, ал S02260006 коды көлікті жаңарту қажет екенін көрсетеді.
Model 3 Premium — седанның орта нұсқасы. Германияда ол €44 990-нан басталады, базалық Model 3 €36 990, ал Performance €58 490 тұрады, салық пен субсидия бұған кірмейді. Premium нұсқасы WLTP циклі бойынша 750 км-ге дейін жүреді.
Дереккөздер: autoevolution — Model 3 Premium-ді кері шақыру, EC Safety Gate — SR/02850/26 кері шақыру картасы
