Сэм Альтман: OpenAI өз гуманоид роботын жасайды

OpenAI адамға ұқсайтын өз роботын жасайды. Мұны компанияның CEO-сы Сэм Альтман Sources подкастында ашық айтты. OpenAI гуманоид құра ма деген сұраққа ол қысқа ғана «Құрамыз» деп жауап берді. Алғашқы көрсетілімді Альтман 2027 жылға уәде етіп отыр, ал көшеде жүрген роботтар одан кейін бірнеше жылдан соң ғана пайда болады.

Роботтың пішінін Альтман қарапайым түсіндірді. Әлем адамға лайықтап салынған. Сондықтан сол ғимараттарда жұмыс істейтін машинаға адамдікіне ұқсас дене ыңғайлы. Ал басты міндет корпуста емес, «мида», яғни роботты басқаратын модельде жатыр. Оның сөзінше, құрылыс мәселелері «роботты жұмыс істететін миды түсінуден гөрі маңызы аз».

Жоба туралы не белгілі

Мерзімін Альтман бұған дейін Fortune-ға берген сұхбатында атаған. «Менің ойымша, 2027 жылы керемет көрсетілім жасаймыз. Бірақ роботтар көшеде тағы бірнеше жыл жүрмейді», — деді ол. Нақты не көрсетілетінін, робот қандай болатынын және оны басқа компаниялар қашан алатынын OpenAI айтпай отыр.

Бос орындар көбірек мәлімет береді. OpenAI мансап сайтында робототехника бойынша 27 вакансия ашық. Компания өзі әзірлейтін электрмеханикалық жетектерге инженер іздейді: қозғалтқыш, редуктор, датчик және салқындату жүйелері. Қозғалысты басқару, роботтың орнын бағалау және «физикалық ЖИ-ді» оқытатын инфрақұрылым бойынша да орындар бар. Ал өндіріс пен жеткізу тізбегі мамандарын жалдауы OpenAI темірді сериямен шығаруға дайындалып жатқанын көрсетеді.

Компания мақсатын екі кезеңге бөледі. Жақын мақсат — білікті жұмысшыларға инфрақұрылым салуға көмектесетін әмбебап роботтар. Алыс мақсат — үй мен тұрмыстағы көп шаруаны атқаратын жеке робот.

Бәсекелестер мен бұрынғы тәжірибе

OpenAI үшін робототехника жаңа сала емес. Бірнеше жыл бұрын оның Dactyl жобасы механикалық қолды симуляцияда үйреткен, кейін сол қол Рубик текшесін жинады. Алайда компания тілдік модельдерге ауысқан соң бұл бағыт ұзақ уақыт көлеңкеде қалды.

Енді OpenAI мықты ойыншылары бар нарыққа кіріп отыр. Tesla бірнеше жылдан бері Optimus гуманоидын дамытып келеді. Қытайлық XPENG жақында IRON роботы құрастырылғаннан кейін конвейерден өзі түсіп кеткенін көрсетті. OpenAI-дың артықшылығы — модельдерде. Ал әлсіз жері — темір мен өндіріс, оларды компания нөлден дерлік құруы керек.

Роботтың бағасын, сатылым мерзімін және ол жинайтын деректерді өңдеу ережесін OpenAI әзірге атаған жоқ. Қазақстанға қатысты жоспар туралы да сөз жоқ. Әзірге компания бағдарламалардағы агенттерді алға тартып жатыр: жақында ChatGPT браузерді басқаруды үйренді. Альтман дәл осындай дағдыларды физикалық әлемге көшіргісі келеді.

Дереккөздер: Engadget — Альтман OpenAI гуманоид роботы туралы, dev.ua — Альтманның Fortune-ға сұхбаты және OpenAI вакансиялары