Reflection стартапы ашық ЖИ-модель шығаруға дайындалуда
Компанияны Nvidia қолдайды, көктемде оның құны $20 млрд-қа жуық бағаланған, бірақ ол әлі күнге дейін флагман модель көрсеткен жоқ.
Иллюстрация: Axios
Nvidia қолдайтын американдық Reflection AI стартапы жақын арада салмақтары ашық қуатты ЖИ-модель шығаруға әзірленіп жатыр. Бұл туралы 4 қазанда Axios хабарлады. Басылымның мәліметінше, модель алдыңғы қатарлы американдық әзірлемелерден қалып қояды, бірақ ең үздік қытайлық ашық модельдермен бәсекелесе алады.
Салмақтары ашық модельді жүктеп алып, өз серверіңде іске қосуға болады. Компаниялар деректерін сырттағы сервиске бергісі келмегенде осындай модельдерді таңдайды. Бұл сегментте Reflection-ның басты бәсекелестері — DeepSeek сияқты қытайлық модельдер.
«ЖИ-фабрикаларға» бәс
Reflection бір модельмен шектелмек емес. Компания Axios «ЖИ-фабрика» деп атаған өнімді сатқысы келеді. Оның көмегімен ұйымдар өз деректеріне, Reflection модельдеріне және оның есептеу қуатына сүйеніп, жеке ЖИ-жүйелерін құра алады. Есеп мынадай: арзан ашық модель сапалы корпоративтік деректермен бірге кейбір міндеттерде қымбат озық жүйелермен тең түсе алады.
«ЖИ-фабрика» идеясын Nvidia-ның CEO-сы Дженсен Хуанг көптен бері насихаттап келеді. Ол Reflection-ды қолдайды және компаниялар өз деректеріне өздері иелік ететін темір мен ашық модельдер байланысын жақтайды.
Reflection-ның негізін қалаушылардың бірі әрі CEO-сы Миша Ласкин үлкен модельдерді зымырандарға теңеді. «Үлкен зымыран жасау үшін уақыт керек», — деді ол Axios-қа.
Reflection-ның артында кім тұр
Ласкин мен екінші негізін қалаушы Иоаннис Антоноглу Google DeepMind-тан келген. Антоноглу AlphaGo, AlphaZero және Gemini жобаларында жұмыс істеген, ал Ласкин Gemini-ді оқытумен айналысқан. Олар компанияны 2024 жылдың басында құрды.
Инвесторлар Reflection-ға алғашқы ірі релизге дейін-ақ миллиардтар салды. Turing Post мәліметінше, 2025 жылғы наурызда стартап шамамен $545 млн бағамен $130 млн тартқан, ал 2025 жылғы қазанда $8 млрд бағамен $2 млрд жинаған. 2026 жылдың көктемінде ол тағы $2 млрд іздеді, ал бағасы $20 млрд-қа жақындады.
Reflection релиздің нақты күнін айтқан жоқ. Axios дерегінше, қазанда басқа да батыстық ашық модельдер күтіледі. Nvidia үшін Reflection — ашық ЖИ нарығына тігілген бәстердің бірі, ал компания бұл нарықта модельдерді оқыту мен іске қосуға арналған чиптерді сатады.
Дереккөздер: Axios — Reflection ашық модель дайындап жатыр, Turing Post — Reflection AI-дың негізін қалаушылары мен инвестиция раундтары, AI Weekly — Reflection және қытайлық бәсекелестер
