Қытайдың б/у электромобильдері ЕО бажын айналып өтті

Еуропалықтар Қытайдан келетін жаңа көліктерге салынған ЕО бажын екінші қолдағы қытай электромобильдері арқылы айналып өтіп жүр. China EV Marketplace (CEVM) онлайн-алаңының дерегінше, қыркүйектің қорытындысы бойынша мұндай көліктердің Еуропалық одақтағы клиенттерге сатылымы бір жылда 280%-ға өсіп, 7900 данаға жетті. Олар орта есеппен бастапқы бағасынан шамамен 40% арзан тұрады.

Бұл жол заңды. ЕО Қытайдан әкелінетін жаңа электромобильдерге 45,3%-ға дейін баж салады, ал қосылатын гибридтерге квота енгізілген. Жүрілген көліктерге бұл шектеулер қолданылмайды. «Екінші қолдағы көліктер электромобильдерге салынатын қосымша баждан да, гибридтерге (PHEV) енгізілген жаңа квотадан да босатылған», — деді CEVM операциялық директоры Якуб Гершл.

Көліктер неге соншалық арзан

Қазір CEVM сайтында екінші қолдағы 2600-ден астам қытай электромобилі тұр, олардың арасында BYD, Geely және Zeekr бар. Гершлдің айтуынша, жүрілген көліктердің бағасын Қытайдың өзіндегі жаңа көліктерге берілетін жеңілдіктер төмен түсіріп отыр. «Біз шамамен 6000 км жүрген, Қытайдағы бастапқы бағасынан 40% арзан көліктерді жиі табамыз», — деді ол.

Баж салдарынан еуропалықтар жаңа қытай электромобильдерін аз ала бастады. «Тарифтер еуропалық клиенттеріміздің жаңа қытай электромобильдеріне сұранысын әлсіретіп те үлгерді», — деп мойындады Гершл. Сондықтан компания Еуропада дәл екінші қолдағы көліктерге басымдық беріп отыр.

Сұраныс неге өсіп жатыр

Electrek мұндай көліктерге қызығушылықты Иран төңірегіндегі қақтығыс аясында жаңа көлік бағасының өсуімен байланыстырады. Екінші қолдағы қытай электромобильдері Еуропаға ғана емес, Канадаға да кетіп жатыр. Ол жақта да Қытайдан жаңа көлік әкелу квотамен шектелген. Сол квотаға байланысты Tesla кезінде Қытайда құрастырылған арзан Model 3-ке тапсырыс алуды тоқтатқан.

Дереккөздер: Electrek — Еуропа мен Канададағы екінші қолдан қытай электромобильдері