Қытай алпауыттары Nvidia-дан $35 млрд-тық чип сұрады
Nvidia серіктестеріне тапсырыстың 5–10%-ын ғана ала алатынын ескертті, ал сериялық жеткізу 2027 жылдың бірінші тоқсанында ғана басталады.
Фото: Christian Wiediger / Unsplash
ByteDance, Alibaba және Tencent Nvidia-ға 3 млн-нан астам RTX PRO 5500 видеокартасына тапсырыс берді. Прайс бағасымен есептегенде бұл $35 млрд-тан асады. Сейсенбі күні мұны Reuters агенттігі екі дереккөзге сілтеме жасап хабарлады. Алайда Nvidia тапсырыстың орындалатынына кепілдік бере алмайтынын клиенттеріне ескертіп қойған.
Агенттік дереккөздерінің айтуынша, қытайлық компаниялар бір карта үшін шамамен $11 400 төлейді. Қытайдан түскен тапсырыстардың жалпы көлемі 6 млн данадан асты. Reuters дереккөздерінің сөзінше, сұраныс «Nvidia жоспарлаған өндірістен әлдеқайда көп».
Олардың бірі серіктестер сұрағанының 5–10%-ын ғана алуы мүмкін дейді. Екіншісінің бағалауынша, 2027 жылы Nvidia бүкіл әлемге мұндай картаның 3 млн-нан артығын шығара алмайды. Екі дереккөздің болжамынша, 2027 жылдан бастап компания TSMC қуатының басым бөлігін дата-орталықтарға арналған Rubin платформасына береді.
Неге дәл осы карта
RTX PRO 5500 — сервер үдеткіші емес, қуатты кәсіби компьютерлерге арналған жұмыс видеокартасы. Дегенмен қазір бұл қытайлық компаниялар заңды түрде сатып ала алатын ең өнімді Nvidia модельдерінің бірі. АҚШ-тың экспорт ережелері Қытайға Blackwell архитектурасындағы B300 үдеткішін сатуға тыйым салады. Ал ескірек H200 жеткізілімін Вашингтон әр жағдай бойынша жеке қарайды.
Сатып алушылар карталарды негізінен инференске, яғни оқытылып қойған модельдерді іске қосуға пайдаланбақ. Бір жыл бұрын Қытай нарығы қуаты қысқартылған RTX 6000D-ге онша қызықпады, сондықтан Nvidia оны шығаруды тоқтатты.
Nvidia клиенттеріне алғашқы үлгілерді желтоқсанда, ал сериялық жеткізуді 2027 жылдың бірінші тоқсанынан бастап уәде етті. The Information дерегінше, Бейжің Alibaba мен ByteDance-ке жаңа карталарды алуға рұқсат беруі мүмкін. Шэньчжэньдік Tansun Technology 13 қазанда 20 мың карта сатып алмақ екенін хабарлады. Сонымен бірге компания тапшылық пен шетелдік технологиялық бақылау жеткізу мерзімі мен көлеміне кедергі келтіруі мүмкін екенін ескертті.
Nvidia өкілі Reuters-ке берген түсініктемесінде қытайлық жұмыс чиптерін жасаушылар 2022 жылдан бері «бұрын-соңды болмаған өсім» көрсетіп отырғанын айтып, америкалық шектеулерді ескірген деп атады. Nvidia басшысы Дженсен Хуанг бұған дейін санкциялар салдарынан компанияның Қытайдағы дата-орталықтарға арналған ЖИ чиптері нарығындағы үлесі нөлге жуықтағанын айтқан. ByteDance, Alibaba, Tencent және АҚШ Сауда министрлігінің Өнеркәсіп және қауіпсіздік бюросы агенттік сұрауына жауап бермеді.
Қытайлық компаниялар қатар жергілікті чиптерге көшіп жатыр. Huawei үлесін арттырып келеді, ал Alibaba қыркүйекте өзінің Zhenwu V900 процессорын таныстырды. Nvidia Қытайдағы мұндай ажиотажды бұрын да көрген: ол кезде қытайлықтар 1 млн видеокарта сатып алған еді.
Дереккөздер: The Next Web — RTX PRO 5500 тапсырыстары туралы Reuters деректері, Tom’s Hardware — 3 млн картаға тапсырыс туралы
