Отбасылардың 18%-ы тамаққа шығынның 70%-ынан көбін жұмсайды

2026 жылдың II тоқсанында қазақстандық үй шаруашылықтарының 18,3%-ы тұтыну шығынының 70%-ынан астамын азық-түлікке жұмсады. Ұлттық статистика бюросының LS талдаған деректеріне қарағанда, бір жылда мұндай отбасылардың үлесі 1,5 пайыздық тармаққа өсті. Үй шаруашылықтарының 66,8%-ы шығынының жартысынан көбін тамаққа береді, ал оған 20%-дан аз жұмсайтындар бар болғаны 0,9%.

Орташа көрсеткіштер азық-түліктің барлық дерлік түрін тұтыну артқанын көрсетеді. Тоқсан ішінде адам басына 21,6 кг ет пен ет өнімі келді, бұл бір жыл бұрынғыдан 5,3%-ға көп. Жұмыртқа 54,7 дана болды (+5,2%), сүт өнімдері 61,4 кг (+4,2%), көкөніс 21,6 кг (+3,8%).

Балық пен нан ең аз өсті. Адам басына 3,6 кг балық пен теңіз өнімі (+2,8%), 31,2 кг нан мен жарма (+1,6%) тиді. Картоп 11,4 кг болды (+3,6%), жеміс, жидек пен жаңғақ 18 кг (+3,4%).

Алайда орташа сандардың артында отбасы көлеміне қарай үлкен алшақтық жатыр. Жалғыз тұратын адам тоқсанына 39,4 кг ет жеген. Үш адамнан тұратын отбасында бұл көрсеткіш 23,1 кг, ал бес және одан көп адамы бар отбасыларда 15,9 кг, яғни 2,5 есе аз. Сүт өнімдерінде айырма 2,8 есеге жетеді: 124,6 кг-ға қарсы 44,1 кг. Жалғыз тұратындарда адам басына 117,9 жұмыртқа келсе, көп балалы отбасыларда 36,8 ғана.

Тамақ шығынының үлесі жоғары болса, отбасыда басқа қажеттілікке ақша қалмайды, ал азық-түліктің кез келген қымбаттауы оған қаттырақ тиеді. Салыстыру үшін, II тоқсанда Қазақстандағы орташа жалақы 486 388 теңге, ал медианалық жалақы 348 415 теңге болды. Қай өңір мен салада көп төлейтінін бөлек жазғанбыз.

Дереккөздер: LS — ҰСБ деректері бойынша 2026 жылғы II тоқсандағы азық-түлік тұтыну, Rizz — 2026 жылғы Қазақстандағы орташа жалақы