Мелони өз дауысын тауар белгісі ретінде тіркемек

Италия премьер-министрі Джорджа Мелони Еуропалық одақтың Зияткерлік меншік жөніндегі ведомствосына (EUIPO) өз дауысын дыбыстық тауар белгісі ретінде тіркеуге өтінім берді. Осылайша ол жасанды интеллект жасаған дауыс көшірмелерінен қорғанбақ. Өтінім туралы мәлімет 5 қазанда белгілі болды, қазір ол қаралып жатыр.

Өтінімге төрт секундтық аудиожазба қоса берілген. Онда Мелони итальян тілінде «Io sono Giorgia Meloni», яғни «Мен Джорджа Мелонимін» деп екі рет айтады. Бұл сөз кездейсоқ таңдалмаған. Мелони оны 2019 жылы митингте айтқан, содан кейін ұран вирустық ремикстер арқылы бүкіл Италияға тарады, ал 2021 жылы оның өмірбаяндық кітабының атауына айналды.

Тіркеудің өзі ЖИ жасаған жалғандықтарды тоқтатпайды. Алайда EUIPO өтінімді мақұлдаса, Мелонидің дауысын рұқсатсыз пайдаланғандарға қарсы қосымша заңдық құралы пайда болады.

Мұны неге істеп отыр

Мелонидің өңделген суреттері желіде талай рет тарады. Мамырда ол бұл туралы: «Мен өзімді қорғай аламын, бірақ көп адам қорғай алмайды», — деді. 2024 жылы премьер оның бет-бейнесімен порнографиялық дипфейк жасады деп айыпталған адамға қарсы жеке сотқа шағым түсірді. Бұл іс әлі аяқталған жоқ.

Бұл жолмен Мелони бірінші жүріп отырған жоқ. Бірнеше ай бұрын итальяндық поп-әнші Джузи Феррери де осындай өтінім берген. Әлемдік жұлдыздар да осы мәселеге тап болған. 2024 жылы желіде Тейлор Свифттің ЖИ жасаған әдепсіз суреттері тарады. Скарлетт Йоханссон OpenAI чат-ботының дауысын өз дауысына «қорқынышты түрде ұқсас» деп наразылық білдірді, содан кейін компания ол дауысты алып тастады. Жақында Жапония соты алғаш рет аниме дыбыстаушы актердің дауысын құқықтық қорғауға алды.

Дереккөздер: ANSA — Мелони дауысын қорғауға өтінім берді, AP — Мелони поп-жұлдыздардың соңынан дипфейкке қарсы дауысын тіркейді