Google экраны мен GPS-і бар Fitbit Edge трекерін шығарды
Бес минут зарядтау бір күнге жетеді, ал тұрақты экранды өшірсе, трекер шамамен бір апта жұмыс істейді.
Фото: Google
Google 12 қазанда AMOLED экраны, GPS және ЭКГ датчигі бар Fitbit Edge фитнес-трекерін таныстырды. Оның бағасы $179,99. Алдын ала тапсырыс сол күні ашылды, ал сатылым 27 қазанда басталады. Бұл Google-дың биылғы екінші трекері: мамырда экраны жоқ Fitbit Air шыққан.
Ұзынша пішінді экранды Gorilla Glass 3 әйнегі қорғайды. Ол 2023 жылғы Fitbit Charge 6 экранынан 46% үлкен. Ал GPS, Google дерегінше, 40% дәлірек. Корпусы алюминийден, қалыңдығы 11,5 мм. Бүйірінде үлкен физикалық батырма бар, мысалы, жүзу кезінде оны басу ыңғайлы.
Ішінде жеке биіктік өлшегіш, пульс, тері температурасы, қандағы оттегі және ЭКГ датчиктері орнатылған. Трекер IP68 және 5ATM стандарттары бойынша шаң мен судан қорғалған.
Батарея және функциялар
Тұрақты экран өшірулі болса, Edge шамамен бір апта, қосулы болса шамамен екі күн жұмыс істейді. Бес минут зарядтау бір күнге жетеді, толық зарядтау 90 минутқа созылады. Зарядтағыш магнитті, USB-C арқылы қосылады, Fitbit Air-дікімен бірдей. Корпусын ашып, батареясын ауыстыруға болады.
Edge Android-пен де, iOS-пен де жұмыс істейді. Трекер хабарламаларды көрсетеді, музыканы басқарады. Алайда хабарламаларға жылдам жауап беру тек Android-та бар. Google Maps навигациясы бар, ал Google Wallet жоқ, себебі трекерде NFC орнатылмаған.
Edge 50-ден астам жаттығу түрін бақылайды. ЖИ негізіндегі белсенділікті автоматты тану 100-ден астам жүктеме түрін ажыратады, бұрын 10 түрін ғана танитын. Қазан айының соңына қарай Edge пен Fitbit Air-ге Health Guardian функциясы келеді. Ол айына бір рет қан қысымы мен инсулинге төзімділік үрдістері туралы шолу жібереді. Функция тек Google Health Premium жазылымымен қолжетімді.
Бағасы мен нұсқалары
Трекер корпусының төрт түсі бар. Stephen Curry Special Edition нұсқасы фирмалық бауымен бірге бөлек сатылады, бағасы $219,99. Ауыстырмалы баулар силиконнан жасалғаны үшін $39,99-дан металл білезік үшін $149,99-ға дейін тұрады.
Fitbit Edge-тің Қазақстанда қашан және қандай бағамен сатылатынын Google әзірге хабарлаған жоқ.
Дереккөздер: 9to5Google — Fitbit Edge сипаттамалары, бағасы мен сатылым күндері туралы, Engadget — Health Guardian және белсенділікті тану туралы
