Freedom жүк көлігін өлшеу жүйесіне 112 млрд ₸ салады
Компания жүк ағынының шамамен 80%-ын бақылауға алмақ, ал жол жөндеуден үнемді шамамен 1 трлн теңге деп бағалайды.
Фото: Freedom Holding Corp.
Freedom Holding Corp. еншілес компаниясы Freedom Lab автожолдарды бақылаудың зияткерлік жүйесіне (ИСКАД) 112 млрд теңгеден астам қаржы салады. Көлік министрлігімен келісімге Шымкентте IX Қазақстандық жаһандық инвестициялық дөңгелек үстелде (KGIR) қол қойылды. Жүйе тас жолдарда жүк көліктерін өлшейді. Мақсат — артық жүк тиеген фуралар жолды бұзбауы.
ИСКАД-тың негізі — автоматты өлшеу станциялары (АӨС). Олар көліктің салмағын, габаритін және осьтерге түсетін жүктемені тіркейді. Деректер қорғалған арналар арқылы бірыңғай платформаға жіберіледі. Компания жүйе тек дерек жинайтынын айтады. Ал бұзушылық пен айыппұл туралы шешімді мемлекет қабылдайды.
Жобаны бір орындаушы жүргізеді. Алдымен қазір жұмыс істеп тұрған 85 станция түгенделіп, жаңартылады. Одан кейін тағы 135 жаңа станция орнатылады. Барлық АӨС жұмысын жеке ситуациялық орталық қадағалайды.
«Freedom Lab» ЖШС бас директоры Шыңғыс Құлахметов жүйе жүк ағынының шамамен 80%-ын қамтиды деп күтеді. Оның бағалауынша, жолдың тозуы азаюынан түсетін экономикалық әсер шамамен 1 трлн теңге болады. Компания есебінше, 10 жылда жоба 400-ге жуық жол апатының, 177 өлімнің және 1400-ден астам жарақаттың алдын алады.
Жоба Қасым-Жомарт Тоқаевтың жолдауынан кейін бірден жарияланды. 28 қазанда президент сапалы жолсыз және заманауи жол бойы инфрақұрылымынсыз Қазақстан жаһандық транзит магистралі бола алмайтынын айтты. Сол күні ол елдегі барлық жолды Көлік министрлігіне берді. Freedom Holding компаниясын миллиардер Тимур Турлов бақылайды.
Дереккөздер: Kapital.kz — Freedom ИСКАД-қа 112 млрд теңгеден астам салады
