DeepSeek тапсырманы өзі алатын ЖИ агентінің кодын ашты

Қытайдың DeepSeek компаниясы 31 қазанда GitHub-қа бағдарламашыларға арналған Super-agent ЖИ агентінің прототипін жариялады. Агент репозиторий мен команданың жұмыс чатын бақылап отырады, лайық тапсырманы өзі алып, нәтижені кодқа өзгеріс енгізу сұрауы түрінде қайтарады. Код еркін MIT лицензиясымен ашық. Алайда компания мұны ресми өнім емес, зерттеу әзірлемесі деп ескертеді.

Хабарламаны DeepSeek Harness командасы WeChat-та жариялады. DeepSeek Harness — компанияның ЖИ агенттерін іске қосатын өз ортасы, ал Super-agent оның ішінде қосымша ретінде жұмыс істейді. Агент GitHub-тағы бір репозиторийге, қаласаңыз ByteDance-тің корпоративтік мессенджері Feishu-дағы топтық чаттарға қосылады. Алғашқы тәулікте репозиторий GitHub-та бірнеше мың жұлдыз жинады.

Агент қалай жұмыс істейді

Агентке тапсырманы рұқсат етілген тізімдегі адам береді, не команданың алдын ала жазылған ережесі іске қосады. Әр тапсырманың өз сессиясы мен жұмыс папкасы болады, ал жауап өтініш айтылған әңгімеге келеді. Тұрақты «роутер» модулі адамдармен сөйлесіп, ортақ контекстті сақтайды. Ал жеке «орындаушылар» тапсырмаларды қатар шешеді. Жергілікті веб-панельде адам тек өзі шешуі керек нәрсені ғана көреді.

DeepSeek басты қағидатын құжаттамада былай жазды: «Адам назарын мүмкіндігінше аз алып, мүмкіндігінше көп пайда беру». Агент тек өтініш болғанда немесе жазбаша ереже тікелей рұқсат еткенде ғана әрекет етеді. i-scoop дерегінше, әдепкі бойынша ол бақылау режимінде жұмыс істейді: алар еді деген тапсырмаларды белгілейді, бірақ өзі қолға алмайды.

Жылдам, бірақ қымбатырақ

Репозиторийде бенчмарктер жоқ. i-scoop баяндаған DeepSeek мақаласында синтетикалық сынақ сипатталған: шамамен 300 хабарлама және 20-ға жуық жұмыс тапсырмасы. Super-agent бір тапсырмаға орта есеппен 12,4 минут жұмсады. Субагенттері бар кәдімгі сессия 20,4 минутта, ал жұмысты бөлуге кеңес берілгенде 13,8 минутта үлгерді.

Super-agent нәтижесі де тұрақтырақ: жағдайлардың 95%-ында ол 15,7 минутқа сыйды, ал жалғыз сессияда бұл көрсеткіш 29–29,5 минут болды. Есесіне бір сынақта агент 23,2 млн кэштелген токен оқыды, яғни шамамен екі есе көп. DeepSeek нәтижелерді алдын ала деп атайды, себебі сынақ код сапасын емес, үйлестіруді өлшеді.

Шектеулер

DeepSeek нақты модельді атамайды: агент DeepSeek Harness профилінде бапталған модельді пайдаланады. Агенттің екі бөлігі де пайдаланушы атынан жүйеге толық қолжетімділікпен іске қосылады және оның үй папкасын оқи алады. Сондықтан DeepSeek агентке бөлек есептік жазба ашуға кеңес береді. Корпоративтік GitHub Enterprise Server қолдау таппайды.

Bloomberg бұл релизді Anthropic-тің бағдарламашыларға арналған Claude Code агентіне сын деп атады. Тәсілдердің айырмасы анық: Claude Code әзірлеушінің бұйрығымен жұмыс істейді, ал Super-agent қалай көмектесуге болатынын өзі іздейтін команда мүшесі ретінде ойластырылған.

Код тегін әрі GitHub-та ашық тұр, оны Қазақстаннан да жүктеп алуға болады. Ақшаны таңдалған провайдердегі тілдік модельге жіберілген сұраулар үшін төлеуге тура келеді. DeepSeek негізін қалаушыға қанша табыс әкелгені туралы Лян Вэньфэннің байлығы жайлы материалда жаздық.

Дереккөздер: GitHub — Super-agent репозиторийі мен құжаттамасы, ShiftDelete — DeepSeek хабарламасы және пікірлер, i-scoop — агенттің құрылымы мен сынақ нәтижелері