АҚШ-та Xbox сатылымы 25 жылдағы ең төмен деңгейге түсті
АҚШ-та дисководы бар Xbox Series X енді $799,99, ал PlayStation 5 Pro $899,99 тұрады.
Фото: Wikimedia Commons
2026 жылғы қаңтар–тамыз айларында америкалықтар Xbox консолін былтырғыдан 33% аз сатып алды. Бұл приставка шыққалы бергі 25 жылға жуық уақыттағы ең нашар көрсеткіш. Дәл осы кезеңде PlayStation 5 сатылымы 25%-ға құлап, 2013 жылдан бергі ең төмен деңгейге түсті. Circana талдау компаниясының деректерін оның сала жөніндегі кеңесшісі Мэт Пискателла жариялады.
Пискателла Bluesky желісінде АҚШ-тағы Xbox сатылымы жыл басынан бері тарихи минимумда тұрғанын жазды. Оның бағалауынша, америкалық приставка нарығы 1980 жылдардың басынан бері мұндай тұрақсыз күйде болмаған.
Консольдер арзандамай, қымбаттап жатыр
Әдетте өмірлік циклінің ортасына қарай приставкалар арзандайды. Қазір керісінше болып тұр. Microsoft екі жылда Xbox бағасын үш рет көтеріп, 2 ТБ нұсқасын сатудан алып тастады. Xbox Series S 512 ГБ моделі $499,99, ал 1 ТБ моделі $599,99 тұрады. Xbox Series X дисководсыз $749,99, дисководымен $799,99 болады.
Sony PlayStation 5 бағасын $100–150-ге көтерді. Цифрлық нұсқасы $599,99, дисководы бары $649,99 тұрады. PS5 Pro-ның ұсынылған бағасы — $899,99. PlayStation Portal портативті құрылғысы алғашқы $199,99-дан $249,99-ға дейін қымбаттады.
Тапшылықты бөлшек саудагерлер де пайдаланып отыр. GameStop желісінде қалпына келтірілген PS5 Pro $1399-ға сатылады, яғни ұсынылған бағадан шамамен $500 қымбат. Қалпына келтірілген PS5 Slim $100-ге қымбаттап, $399 болды.
Неге бұлай болып жатыр
Tom’s Hardware бағаның өсуін жасанды интеллект бумы тудырған чип тапшылығымен байланыстырады. Екінші себеп — тұрмыс құнының өсуі. Сондықтан көп отбасы үшін приставка сатып алу екінші кезекке ысырылды.
Circana деректері тек АҚШ нарығын қамтиды. Приставкалардың қымбаттауы Қазақстандағы бағаға қалай әсер еткенін Microsoft пен Sony әзірге хабарлаған жоқ.
Дереккөздер: Tom’s Hardware — АҚШ-тағы консоль сатылымы туралы Circana деректері
