Apple Keynote, Pages және Numbers-қа OpenAI ЖИ-ін қосты
MCP хаттамасы арқылы бөгде ЖИ агенттері Keynote, Pages және Numbers құжаттарын өздері оқып, түзете алады.
Фото: Apple
Apple 27 қазанда Apple Creator Studio жиынтығының ірі жаңартуын жариялады. Keynote, Pages, Numbers және Logic Pro бағдарламаларында ЖИ көмекшісі пайда болады. Ол Apple-дың өз модельдері мен OpenAI модельдерінде жұмыс істейді. Жаңартулар App Store-ға қарашада шығады, Creator Studio жазылушылары үшін тегін.
Көмекші құжаттың мазмұнын түсінеді. Keynote-та слайдтарды безендіріп, анимация қосып, жетілдіруге көмектеседі, Pages-те мәтін жазып, құрылымын өзгертеді. Numbers-те есептейді, график салады, диаграмманың қолайлы түрін ұсынады, ал әлем туралы жалпы білімге сүйеніп кесте құрастырады. OpenAI-дың нақты қай модельдері қолданылатынын Apple айтпады.
Әзірге көмекші бета режимінде және тек американдық ағылшын тілінде жұмыс істейді. Ол үшін Apple Intelligence қолдайтын құрылғы және iOS 27, iPadOS 27 немесе macOS 27 керек.
Бөгде агенттерге жол
Keynote, Pages және Numbers MCP хаттамасын да қолдайтын болды. Бұл ашық хаттама арқылы сыртқы ЖИ агенттері бағдарламаларға қосылады. Сондықтан бөгде агенттер құжаттарды оқып, түзетіп, автоматты әрекеттерді іске қоса алады. Бұл мүмкіндік macOS 27 немесе одан жаңа нұсқаны талап етеді.
Mac-тағы Logic Pro-да көмекші жаңа ән бастауға, вокал жолын бір командамен баптауға немесе жобаны пысықтауға көмектеседі. Stem Splitter құралы енді барабан партияларын бастапқы көпжолды жазбасыз бөліп алып, ауыстырып, теңгерімін өзгерте алады.
Pixelmator Pro-ға Generate Fill функциясы қосылды. Пайдаланушы суреттің бір бөлігін белгілеп, не өзгеруі керегін жазады. Ал бағдарлама нәтижені жарыққа, перспективаға және текстураға сәйкестендіреді. Final Cut Pro мен Motion мәтіндік сипаттама бойынша сурет салуды үйренді.
«Бұл Apple Creator Studio іске қосылғаннан бергі ең қызық жаңарту», деді Apple-дың қосымшалар мен iCloud жөніндегі жаһандық маркетинг аға директоры Брент Чу-Уотсон.
АҚШ-та Creator Studio жазылымы айына $12,99 немесе жылына $129 тұрады, студенттер мен оқытушыларға $2,99 және $29,99. Keynote, Pages, Numbers және Freeform тегін күйінде қалады. Apple бұл жаңартуды M6 чипті жаңа MacBook Pro мен iMac таныстырылған күні жариялады. ЖИ функцияларының Қазақстанда қолжетімді болатынын компания айтпады, ал көмекшілердің өзі әзірге тек ағылшынша түсінеді.
Дереккөздер: Apple Newsroom — Apple Creator Studio жаңартуы
