Anthropic смартфонға арналған Claude Duet агентін шығарды

Anthropic 21 қазанда Claude Duet атты проактивті ЖИ-агентін таныстырды. Ол пайдаланушыға неге назар аудару керегін өзі хабарлайды, қосылған сервистерде тапсырма орындайды, маңызды әрекет алдында рұқсат сұрайды. Әзірге бұл күту тізімі арқылы ашылатын зерттеу нұсқасы, ал оны тек АҚШ-тағы Pro және Max жазылушылары ала алады.

Duet iOS пен Android үшін бөлек қосымша ретінде шықты, компьютерде оны claude.ai арқылы ашуға болады. Агент Claude Opus 5.5 моделінде жұмыс істейді, басқа модельді таңдау мүмкін емес. Бөлек ақы алынбайды, бірақ фондық жұмыс жазылым лимитін жұмсайды.

Агент не істей алады

Duet таңертең қосылған қосымшалар бойынша шолу жібереді, ал қалған уақытта тек бірдеңеге жауап керек болғанда ғана жазады. Оған ірі жұмыс та тапсыруға болады: кездесуге дайындық, дашборд, қаржы не сату болжамы, прототип немесе веб-қосымша. Дайын нәтижелер Make қойындысына жиналады, ағымдағы тапсырмалар Tasks қойындысында көрінеді.

Агент бұлттағы өз виртуалды машинасында, өз браузерімен жұмыс істейді. Сондықтан ноутбук пен телефон өшіп тұрса да, тапсырманы жалғастыра береді. Duet Claude аккаунтынан жадты, дағдыларды және қосылымдарды көшіріп алады. Оған мәтінмен де, дауыспен де жазуға болады.

Anthropic 6000-нан астам коннектор мен плагинге қолжетімділік бар екенін айтады. Анонста Gmail, Slack, QuickBooks, Stripe, Gusto, LinkedIn, Docusign, HubSpot, Canva және Shopify аталған. Агент Stripe-тың виртуалды картасы бар Link әмияны және Shop Pay арқылы төлей алады.

Шектеулер қайда

Хабарлама жіберер, төлем жасар, құжатқа қол қояр немесе бірдеңені өшірер алдында Duet не істейтінін нақты көрсетіп, мақұлдауды күтеді. Бағалы қағаздармен сауда жасауға және шоттар арасында ақша аударуға рұқсат болса да тыйым салынған. Anthropic сөзінше, агент құпиясөздер мен кіру токендерін тікелей көрмейді. Ал банк картасы мен құжат нөмірлерін бөлек классификатор бұғаттайды.

Іске қосу проактивті ассистенттер жарысын қыздыра түседі. 9to5Mac Duet-ті OpenAI-дың ChatGPT Dots және Meta-ның Muse өнімдерімен салыстырады. Team және Enterprise тарифтерін Anthropic кейінірек қосуға уәде береді. Duet-тің АҚШ-тан тыс, соның ішінде Қазақстанда іске қосылуы туралы компания әзірге хабарлаған жоқ. Компания туралы толығырақ — Anthropic досьесінде.

Дереккөздер: Anthropic — Claude Duet анонсы, Claude анықтамасы — қолжетімділік пен лимиттер, 9to5Mac — іске қосу туралы