Android Auto Android 10 телефондарымен қоштаса бастады
Galaxy S9 бен Galaxy Note 9 қолдаусыз қалуы мүмкін, бірақ Google әзірге нақты күнін ресми түрде айтқан жоқ.
Скриншот: BigJem81 / Reddit, Android Authority
Android Auto Android 10 жүйесіндегі смартфон иелерін жақында олармен жұмыс істеуді тоқтататынын ескерте бастады. Хабарлама телефонды көлікке USB кабелі арқылы қосқанда шығады: «Телефон енді қолдау көрмейді». Төменде құрылғы жаңармайтындықтан Android Auto жақында жұмысын тоқтататыны түсіндіріледі. Мұндай алғашқы ескертулер туралы пайдаланушылар 5 қазанда жазды, оған Android Authority басылымы назар аударды.
Google сымды қосылымға қойылатын ең төменгі талапты Android 9 Pie-дан Android 11-ге көтеріп жатқан сияқты. Сымсыз Android Auto үшін 11-нұсқа қазірдің өзінде міндетті. Google талаптың өзгергенін ресми жариялаған жоқ: қолдау бетінде сымды қосылым үшін әлі де Android 9 Pie немесе одан жаңасы көрсетілген.
Кімнің телефоны қатерде
Әңгіме ресми түрде Android 10-да тоқтап қалған, жүйенің жаңа нұсқаларын енді алмайтын миллиондаған құрылғы туралы болып отыр. Олардың қатарында Samsung Galaxy S9, Galaxy Note 9 және Sony Xperia XZ2 Compact бар. Яғни мұндай телефонмен көлік экраны арқылы навигация, музыка мен қоңырау істемей қалады.
Google әзірге нақты күнін атаған жоқ. Ескі смартфон иелеріне жүйені кемінде Android 11-ге жаңартуға бола ма, соны тексеру керек, болмаса телефон ауыстыруға дайындалу қажет. Android Authority атаған тағы бір жол — Android-тың жаңа нұсқасы бар бейресми прошивка.
Дереккөздер: Android Authority — Android 10-дағы Android Auto ескертулері, Google — Android Auto талаптары
