Anthropic акцияларының 5%-ын қоғамдық қорға бермек
Компания құны әр 50%-ға өскен сайын директорлар кеңесі қорға тағы 2% акция қоса алады.
Фото: Anthropic
Claude ЖИ-ассистентін жасаған Anthropic 18 қазанда Anthropic Public Benefit Fund қорын құратынын хабарлады. Акционерлер мақұлдаса, компания жаңа қорға өз акцияларының 5%-ын береді. Қордың қаражаты жұмысына жасанды интеллект әсер ететін адамдарға көмекке жұмсалуы мүмкін.
Қордың үлесі компанияның бағасымен бірге өседі. Оған қоса Anthropic құны базалық деңгейден әр 50%-ға артқан сайын директорлар кеңесі өз шешімімен тағы 2% акция қоса алады. Базалық деңгей қандай екенін компания әзірге ашқан жоқ.
Қор қалай құрылған
Қор толықтай Anthropic-ке тиесілі ЖШС ретінде тіркелді. Компания 501(c)(3) мәртебесі бар әдеттегі қайырымдылық ұйымын таңдамады. Себебі оның айтуынша, мұндай нысан көмек тәсілін таңдауда көбірек еркіндік береді. Қор акцияларын АҚШ-та да, басқа елдерде де лоббиге және саяси қайырымдылыққа жұмсауға тыйым салынады.
Қор коммерциялық емес ұйымдарға ірі қайырымдылық жасай алады немесе белгілі бір топтарға ақшаны тікелей төлей алады. Мысал ретінде Anthropic ЖИ-дің еңбек нарығына әсерін атайды. Компания бұрын бұл әсерді зерттеуге $200 млн бөлген. Алайда қазір ЖИ-дің қазіргі даму қарқынында «батылырақ тәсілдер қажет болуы мүмкін» деп жазады.
Anthropic қорға арналған акцияларды капиталдың әйтпесе топ-менеджерлерге сыйақыға кететін бөлігінен алатынын айтты. Ал қоғамдық жұмыстың негізгі бөлігін, мысалы ЖИ қауіпсіздігін зерттеуді және коммерциялық емес әрі ғылыми ұйымдарға Claude жеңілдіктерін, компания өзі жалғастырады.
Компанияның бестен бірі
Жаңа шешім бұрынғы уәделерді толықтырады. Anthropic негізін қалаушылар, соның ішінде бас директор Дарио Амодей, компанияны құрған кезде өз үлестерінің 80%-ын беруге уәде еткен. Қызметкерлердің жартысына жуығы акциямен берілген қайырымдылықты компания екі есе көбейтетін бағдарламаға қатысады. Қормен бірге Anthropic акцияларының шамамен 20%-ы қоғамдық мақсатқа кетеді, болашақта бағаның өсуі үшін қосылатын үлес бұған кірмейді.
Шешім компанияның биржаға шығуы алдында жарияланды: Bastille Post мәліметінше, IPO қарашада-ақ өтуі мүмкін. Жуырда Anthropic ЖИ жалдауды қалай өзгертетінін өз мысалымен көрсетті: компания джуниорлар үлесін үш есе қысқартты. Қорды басқару тәртібі мен баға шектері туралы толық ақпаратты Anthropic алдағы айларда жариялауға уәде берді.
Дереккөздер: Anthropic — қордың құрылуы туралы, Bastille Post — қор және IPO жоспарлары туралы
