Windows 11 24H2 Home мен Pro жаңартусыз қалды
25H2 нұсқасы 2027 жылғы қазанға дейін, ал қыркүйекте шыққан 26H2 2028 жылғы қазанға дейін патч алады.
Фото: BleepingComputer
Windows 11-дің 24H2 нұсқасының Home және Pro редакцияларына қолдау тоқтады. Microsoft-тың өмірлік цикл кестесі бойынша оның соңғы күні 2026 жылғы 13 қазанға тура келді. Бұл нұсқадағы компьютерлер енді ай сайынғы қауіпсіздік жаңартуларын алмайды. Сондықтан жаңа осалдықтар оларда жабылмай қалады.
24H2 нұсқасы 2024 жылғы 1 қазанда шыққан. Microsoft Windows 11-дің үй және кәсіби редакцияларын әр ірі жаңарту шыққаннан кейін 24 ай қолдайды. Мерзімнің бітуі Pro Education, Pro for Workstations және SE редакцияларына да қатысты. Ал SE оқу редакциясы үшін 24H2 соңғы қолдау көрсетілетін нұсқа болды.
Қай нұсқалар қолдауда қалады
- Windows 11 25H2 — жаңартулар 2027 жылғы 13 қазанға дейін.
- Windows 11 26H2, яғни Windows 11 2026 Update, — 2028 жылғы 10 қазанға дейін.
- Windows 11 26H1 — 2028 жылғы 15 наурызға дейін.
26H2 нұсқасы 29 қыркүйекте қолжетімді болды. Microsoft оны кезең-кезеңімен таратып жатыр. Алдымен баптауларында «Соңғы жаңартуларды қолжетімді болған бойда алу» тармағы қосулы тұрғандар алады. Жаңартуды «Параметрлер» → «Windows жаңарту орталығы» бөлімінен қолмен тексеруге болады. 26H2 Snapdragon 850 процессоры бар компьютерлерді қолдайтын соңғы нұсқа болады.
Корпоративтік редакциялар
Enterprise және Education редакцияларының қолдау мерзімі ұзағырақ, 36 ай. Бұл редакциялардың 24H2 нұсқасы 2027 жылғы қазанға дейін патч алады. Ал Windows 11 23H2 Enterprise, Education және IoT Enterprise үшін 2026 жылғы қарашадағы жаңартулар пакеті соңғысы болады. «Windows-тың 2026 жылғы қарашадағы қауіпсіздік жаңартуы осы редакциялар үшін соңғы болады», — деп ескертті Microsoft.
Windows 10 иелерінің әлі уақыты бар: үй пайдаланушыларына арналған тегін кеңейтілген жаңартулар бағдарламасы 2027 жылғы қазанға дейін ұзартылды. Алайда барлық ескі жүйенің тағы бір шегі бар. Ол туралы 2027 жылы сертификаттардың ауысуына байланысты ескі Windows жаңартусыз қалатыны жайлы материалда.
Дереккөздер: Microsoft — Windows 11 Home және Pro өмірлік циклі, BleepingComputer — 23H2 қолдауының аяқталуы және басқа нұсқалардың мерзімі туралы
