Chery 9 мыңға жуық Omoda C5-ті кері шақырды
Оған 2023 жылғы кроссовердің артқы осі жүріп келе жатқанда үзіліп түсуі себеп болды, ал Малайзия реттеушісі модельдің тип мақұлдауын тоқтатып, жаңа тіркеуді шектеді.
Фото: CarNewsChina
Chery Малайзияда 8878 Omoda C5 кроссоверін кері шақырды. Артқы осьтің бойлық иінтіректері бекітілетін жердегі дәнекер жіктері жеткілікті берік емес болып шықты, ал төтенше жағдайда олар үзіліп кетуі мүмкін. 11 қазанда басталған кері шақыру туралы CarNewsChina хабарлады.
Оған Джохор-Бахрудағы оқиға себеп болды. 8 қазанда 2023 жылы шыққан Omoda C5-тің артқы осі жүріп келе жатқанда толықтай ажырап түсті. Ешкім зардап шеккен жоқ.
Малайзияда модель осы ақау үшін екінші рет кері шақырылып отыр. 2024 жылы осындай оқиғадан кейін Chery 600 көлікті қайтарып алған еді. Бұл жолы C және H нұсқалары ілікті. Шыққан жылдары мен VIN ауқымын компания атамады.
Chery Малайзияның Автокөлік департаментімен бірге тергеуді бірден бастағанын мәлімдеді. Көліктер тексеріледі, қажет болса бөлшектер тегін ауыстырылады. Компанияның айтуынша, ақаулы бекітпесі бар құрылым өндірістен алынып тасталған. Реттеуші болса Omoda 5-ке берілген көлік түрін мақұлдау сертификатын тоқтата тұрды. Техникалық тергеу біткенше жаңа көліктерді тіркеу шектелді.
Малайзияда Omoda C5 108 400–118 400 ринггит (шамамен 12,1–13,2 млн теңге) тұрады. Ұзындығы 4400 мм кроссоверде 154 а.к. 1,5 литрлік қозғалтқыш, вариатор және алдыңғы жетек бар. Chery оған 10 жыл немесе 1 млн км кепілдік береді.
Қазақстандағы көліктер ше
Қазақстанда Omoda C5 2023 жылғы 1 шілдеден бері сатылады, алғашқы партияның бағасы 11,89 млн теңгеден басталған. CarNewsChina мәліметінше, Chery 2023 жылы шыққан көліктерді басқа шетел нарықтарында да осылай тексерген, бірақ елдерді атамаған. Олардың арасында Қазақстан бар-жоғы хабарламада айтылмайды.
Дереккөздер: CarNewsChina — Малайзиядағы Omoda C5 кері шақыруы, Kapital.kz — Omoda C5-тің Қазақстандағы сатылымы мен бағасы, ҚР Ұлттық банкі — 12 қазандағы ринггит бағамы
