Сейітов: A$AP Rocky клипін ЖИ арқылы өзгерткен
Рэпердің креативті директоры Роберт Гальярдо ЖИ материалдарын тексеру кезінде қателік кеткенін мойындап, түпнұсқа видео авторымен байланысқа шықты.
Фото: The Steppe
Қазақстандық режиссёр Айсұлтан Сейітов пен ProdCo продакшн компаниясы 26 қазанда мәлімдеме жасады. Олардың айтуынша, A$AP Rocky-дің «Shroom Clouds» клипіне жасанды интеллект арқылы өзгерістер енгізілген, ал бұл туралы оларға ешкім ескертпеген. Мәлімдеме рэпер командасы плагиатқа айыпталғаннан кейін жарияланды. Сейітов пен ProdCo видеоның ЖИ түзетулеріне дейінгі түпнұсқасын шығаруды сұрап отыр.
Клип YouTube-та 19 қазанда шықты. 25 қазанда видеорежиссёр әрі визуалды эффектілер маманы Cache Bunny оны өзінің 2019 жылғы жұмысымен салыстырды. Ол видеоны режиссёр Ари Фарарумен және неміс паркур спортшысы Джейсон Полмен бірге түсірген.
Дау тудырған эпизодта адам жасыл шөптен жасалған шеңберлер үстімен секіреді. Cache Bunny-дің сөзінше, текстурасы да, кейіпкердің қимылы да, кеңістік геометриясы да сәйкес келеді. Оның ойынша, авторлар бастапқы материалды алып, ЖИ көмегімен адамды A$AP Rocky-ге ауыстырған. Ал одан ешкім рұқсат сұрамаған.
Сейітов пен ProdCo Instagram парақшасында клиптің соңғы нұсқасын көрермендермен бірге көргенін жазды. Сол кезде өздерімен келісілмеген түзетулерді байқаған. Титрда жобаға қатыспаған қосымша режиссёр пайда болған. ProdCo тіпті қосалқы продюсер ретінде де көрсетілмеген. HotNewHipHop дерегінше, титрда Сейітов пен Пьетро Биз Биазиа режиссёр ретінде, сондай-ақ екі ЖИ суретшісі аталған.
Cache Bunny Сейітовті қолдап, режиссёрге ЖИ қолданылатыны туралы айтылмағанын атап өтті. A$AP Rocky-дің креативті директоры Роберт Гальярдо ЖИ материалдарын тексеруде қателік кеткенін мойындады. Сондықтан клипке бөтен адамның жұмысы авторы көрсетілмей енген. Ол Cache Bunny-мен байланысқа шыққан. Алайда әлеуметтік желіде кейбір қолданушылар Сейітовті сынап жатыр. Себебі ол ЖИ туралы тек плагиат айыптары шыққаннан кейін ғана айтты.
Клиппен жұмыс 2022 жылғы наурызда басталған. Ұсынысты Сейітовке рэпердің өзі PacSun брендіне арналған жарнамалық жобадан кейін жасаған. Қазақстандық режиссёрдің бұл клипті қалай түсіргені туралы «Shroom Clouds» клипі шыққанда жазған едік. Рэпер командасы түпнұсқа нұсқаны шығара ма, әзірге белгісіз. Клипті өшіру туралы шешім болған жоқ.
Дереккөздер: The Steppe — A$AP Rocky мен Айсұлтан Сейітов клипі төңірегіндегі дау, HotNewHipHop — плагиат айыптары және клип титрлары
