Porsche 548 спорткарды дөңгелек ақауы үшін шақыртты
Бұл 2024 жылғы кері шақырудың жалғасы: дөңгелектің орталық бекітпесіндегі ақаулы бөлшек сол кезде ойлағаннан көп болып шықты.
Фото: Alex Bogatyrev / Shutterstock
Porsche АҚШ-та жүріп келе жатқанда дөңгелегі түсіп қалуы мүмкін 548 спорткарды кері шақырады. Бұл 911 және 718 модельдері. Дөңгелектің орталық бекітпесінің бөлшектері талаптан ауытқып жасалған, сондықтан олар сынып кетуі мүмкін. Carscoops хабарлауынша, иелеріне дилер жөндемейінше рульге отырмау тапсырылды.
Мәселе жаңа емес. 2024 жылғы қазанда Porsche дәл осы ақау үшін АҚШ-та 1851 көлікті кері шақырған. Алайда мамыр мен тамызда компанияға орталық гайка бөлшектерінің сынғаны туралы жаңа хабар түсті. Тексеріс ақаулы бөлшектің алғашқы шақыру кезінде есептегеннен көп екенін көрсетті.
Қай көліктер шақыртылды
Жаңа шақыруға орталық гайкалы дөңгелек қойылатын ең қымбат әрі ең жылдам нұсқалар кірді:
- 2024 модельдік жылғы 911 Carrera GTS — 168 көлік;
- 2024 жылғы 911 Turbo S — 94;
- 2024 жылғы 718 Cayman GT4 RS — 73;
- 2024 жылғы 718 Spyder RS — 70;
- 911 GT3 — 50;
- 911 GT3 RS — 41;
- 2024 жылғы шектеулі 911 S/T — 39;
- 2024 жылғы 911 Turbo — 13.
Дилерлер дөңгелек бекітпесін тексеріп, Porsche талабына сай келмейтін бөлшектерді ауыстырады. Иелеріне алдағы апталарда электрондық пошта, телефон, MyPorsche қосымшасы және хат арқылы хабарланады. Жолда қатты діріл байқалса, көлікті бірден тоқтату ұсынылады.
Жөндеуге дейін көлік мінуге тыйым салу сирек кездеседі. Мәселен, былтыр АҚШ-та артқы көрініс камерасының ақауы үшін 173 мыңнан астам Porsche шақыртылғанда, иелеріне жүруге тыйым салынбаған. Шақыру Америка нарығына жарияланды. Бұл көліктер бойынша Қазақстанда сервистік науқан өтетіні туралы ресми хабар болған жоқ.
Дереккөздер: Carscoops — Porsche 911 және 718 көліктерін дөңгелек бекітпесі үшін кері шақыру
