Meta ережеден сайттарды ЖИ үшін жинау тармағын алып тастады
Компанияның сөзінше, веб-краулерлер туралы ереже тек жарнама мен бизнес өнімдеріне қатысты болған, ал интернетті шолу тәсілі өзгермеген.
Фото: picture alliance / Getty Images
Meta коммерциялық пайдалану шарттарындағы даулы тармақтан бас тартты. Бұл тармақ оған бизнес-клиенттердің сайттарында ЖИ оқытуға рұқсат берген еді. Өзгерісті The Verge байқады, ал 17 қазанда бұл туралы TechCrunch жазды. Компания заңгерлердің сынынан кейін шегінді.
Алынып тасталған тармақ бойынша Meta бизнес-аккаунттың «домендері, веб-беттері немесе URL-дары» мазмұнын өз модельдерін оқытуға және өнімдерін жақсартуға пайдалана алатын. Nieman Lab сөйлескен заңгерлер оны «назар аударарлық» тармақ деп атады. Олардың бағалауынша, бұл тұжырым Meta-ға оның сервистерінде бизнес-аккаунты бар кез келген баспагердің сайтын жинауға жол ашқан.
Meta не дейді
Meta мәні бойынша ештеңе өзгермегенін айтады. Компания өкілінің сөзінше, жаңартылған шарттар Meta-ның интернетті шолу тәсіліндегі өзгерісті білдірмеген. Компания бөлек мәлімдемесінде былай деп жазды: «Біз сіздерді естідік және түсіндіргіміз келеді: біз біріктірген сканерлеу ережелері тек жарнама және бизнес өнімдерімізге қатысты еді, мұны шарттардың өзінде нақтыладық. Бұл Meta-ның веб-краулерлерді қалай пайдаланатынын өзгертпейді».
Құжатта нақты қандай тұжырымдар қалғанын Meta айтпады. Ал компания модельдерді қандай деректермен оқытады деген сұрақ ашық күйінде қалып отыр. 2025 жылы Meta кітаптармен ЖИ оқыту туралы шулы сотта жеңді. Алайда оған және басқа ЖИ әзірлеушілеріне қарсы өзге талаптар әлі қаралып жатыр.
Қазақстандық бизнес үшін бұның тікелей маңызы бар: бұрынғы редакция Facebook-те жай ғана компания парағын жүргізетіндерге де қатысты болды. Бұған дейін біз Meta-ның жаңа ережелері 30 қазанда күшіне енуі тиіс екенін жазғанбыз.
Дереккөздер: TechCrunch — Meta ЖИ үшін деректер жинау тармағын алып тастады
