Лула төртінші мерзімге жеңді, Бразилия ETF-і 15%-ға құлады

Бразилия президенті Луис Инасиу Лула да Силва 25 қазанда сайлаудың екінші турында жеңіп, төртінші мерзімге сайланды. Бюллетеньдердің 97,69%-ы саналғанда ол 51,74% дауыс алды. Сенатор Флавио Болсонаруда шамамен 48,3% болды. 26 қазан күні таңертең инвесторлар активтерін сата бастады: Токиода саудаланатын Bovespa индексіне арналған ETF шамамен 15%-ға құлады.

Бұрынғы президент Жаир Болсонарудың ұлы Флавио жеңілісін мойындамады. Reuters дерегінше, ол екінші турдың күшін жоюға тырысады. Бұған Жоғарғы сот судьясы Кристиану Занинның шешімі сылтау болуы мүмкін. Дауыс беру күні ол Еңбекшілер партиясының өтініші бойынша кейбір учаскелердің жұмысын 17:00-ден 19:00-ге дейін ұзартты. Құқықтанушылардың пікірінше, бұл жеңілген үміткерге нәтижеге дау айтуға жол ашады.

Лулының жеңісі тарихи бетбұрыс болды. Бірінші турда Флавио 47,03%, ал Лула 45,16% жинаған. Олардың арасындағы айырма 2,2 млн дауыстан асқан. Бразилияда бұған дейін бірінші турдан кейін артта қалған үміткер екінші турда ешқашан жеңбеген.

Goldman Sachs сауда ашылмай тұрып-ақ дүйсенбіге арналған қатаң сценарийді сипаттады. Онда доллар реалға шаққанда 10%-ға қымбаттауы мүмкін. Ұзақ мерзімді мемлекеттік облигациялардың кірістілігі шамамен 200 базистік пунктке өсіп, акциялар 15%-ға арзандауы ықтимал. Чикагодағы соя фьючерстері екі айдағы ең төменгі деңгейге түсті. Себебі нарық Лулыдан Қытаймен жақындасуды күтеді.

Сайлау алдында билік бірнеше танымал шара қабылдады. 3,6 млн шағын кәсіпкердің 15,5 млрд реал қарызы кешірілді. Bolsa Família жәрдемақысы шамамен 15%-ға өсті, ал алты күндік жұмыс аптасы жойылды. Ал жеңілдігі кемінде 90% болатын банк қарызын қайта құрылымдау бағдарламасы әлі іске қосылмаған.

80 жастағы Лула қызметіне 2027 жылғы 1 қаңтарда кірісіп, елді 2030 жылдың соңына дейін басқарады. Алайда оған қарсылас конгреспен жұмыс істеуге тура келеді. Ақпаннан бастап екі палатадағы ең үлкен фракция Болсонарудың Либералдық партиясында болады, оның 121 депутаты бар.

Дереккөздер: Tribuna do Paraná — екінші тур қорытындысы, SP Agora — Лулының өкілеттік мерзімі, investingLive — нарықтың Лула жеңісіне реакциясы, Business Recorder (Reuters) — Болсонарудың жеңілісті мойындаудан бас тартуы