Хакерлер Еуропа дүкендерінің тоңазытқышын тағы қыздырды
Швециядағы бір дүкенде мұздатқыштар 55 °C-қа қойылған, ал Бельгиядағы Delhaize басшысы бүкіл тауарды тастайтынын айтты.
Фото: The Register
Жексенбіден дүйсенбіге қараған түні, 2 қарашада, белгісіз адамдар Бельгия, Ирландия, Люксембург пен Швеция супермаркеттеріндегі тоңазытқыштар мен мұздатқыштарды қашықтан еріту режиміне ауыстырды. Температура 50 °C-қа дейін көтерілгендіктен, кей дүкендер азық-түлігінен айырылды. Бір айда мұндай шабуыл екінші рет болып отыр: қазан айының ортасында Францияда да дәл осындай оқиға тіркелген.
Ең көп зардапты Бельгия шекті. Онда шамамен 40 Delhaize және 15-ке жуық Carrefour дүкені, сондай-ақ Intermarché, Spar және Q8 бекеттеріндегі Shop & Go нүктелері зақымданды. De Laet & Van Haver желісі өз өнімдеріне зиян келмегенін хабарлады.
Оверейсе қаласындағы Delhaize басшысының орынбасары Диего Лауэрс салдарды апатты деп атады. «Бүкіл тауарды тастауға мәжбүрміз», деді ол RTL Info арнасына. Желі өкілі бірнеше ондаған дүкеннің тоңазыту жүйесіндегі IT-ақауды растады. Дүкендер де, тарату орталықтары да жұмысын жалғастырып жатыр.
Швеция мен Ирландия
Швецияда ICA желісі орталық желіден тыс жұмыс істейтін аз ғана дүкенде ақау болғанын айтты. Шығын мен қалпына келтіру мерзімі туралы сұрақтарға компания жауап бермеді. Бёдедегі ICA Nära дүкенінің басшысы Матс Ульссон SVT арнасына мұздатқыштар 55 °C-қа қойылғанын жеткізді. Coop елдің орталығындағы алты нүктесінде тоңазытқыш жабдықтарында ақау шыққанын мәлімдеді.
Ирландияда, Musgrave компаниясының RTE-ге айтуынша, шабуыл кемінде 13 SuperValu дүкенін қамтыған.
Шабуылдың артында кім тұр
The Register-ге жауап берген компаниялар кінәлілердің атын атамады. Бұзушылар Франциядағы тәсілді қолданды ма, ол да белгісіз. Ол кезде Carrefour, Coopérative U, Intermarché, Monoprix және басқа желілер зардап шеккен. Кей дүкендердегі тоңазыту жабдықтарын басқаратын Danfoss AK-SM және AK-SC контроллерлерінің микробағдарламасы ескі болып шықты, сондықтан француздық CERT-FR агенттігі ескерту жариялады. Алайда Coopérative U Danfoss жабдығын пайдаланбайтынын мәлімдеді.
Қазандағы шабуылдар туралы Франциядағы тоңазытқыштар жазбасында айтқанбыз. Жаңа толқын интернетке қосылған өнеркәсіптік жабдық әлі де әлсіз тұс екенін көрсетті. Қазақстандағы дүкендердің зардап шеккені туралы дерек жоқ.
Дереккөздер: The Register — супермаркет тоңазытқыштарына екінші шабуыл туралы
