Facebook таспаны қарапайым сөзбен баптауға мүмкіндік береді
Бөлім әр жазбаның үш нүктелі мәзірінде орналасқан, ал ұсыныстар сол сессияның ішінде-ақ өзгереді.
Фото: Meta
Meta 13 қазанда Facebook-те «Сіздің алгоритміңіз» бөлімін іске қоса бастады. Онда пайдаланушы таспа мен Reels-те көргісі келетін тақырыптарды өзі қосады. Сондай-ақ нені көбірек, нені азырақ көрсету керегін өз сөзімен түсіндіре алады. Мәтінді чат-боттардың негізінде тұрған үлкен тілдік модельдер талдайды.
Бөлім жазбалардағы үш нүктелі мәзір арқылы ашылады, Meta бұл мәзірді де жаңартты. «Қызық» не «Қызық емес» батырмасын басқаннан кейін Facebook нақтылау сұрақтарын қоюы мүмкін. Оларға еркін түрде жауап беруге болады.
Не өзгереді
Бұрын алгоритм қызығушылықты тек әрекетке қарап болжайтын: лайкқа, пікірге және адамның бейнені қанша уақыт көретініне. Енді бұл белгілерге тікелей сұраныс қосылады. «Тілдік модельдер қарапайым сөздің ар жағындағы қызығушылықты, контекст пен ниетті ескереді», — деп түсіндіреді Meta.
Компания таспа бірден жауап береді дейді. «Нені көбірек не азырақ қалайтыныңызды айтыңыз, ұсыныстар нақты уақытта өзгереді», — делінген хабарламада. Meta-ның сөзінше, іріктеу сұранысқа сол сессияның өзінде бейімделеді.
Әзірге функция тек Facebook-ке қатысты. Meta мерзімдер мен елдер тізімін атамады, іске қосу біртіндеп жүріп жатқанын ғана хабарлады. Бөлімнің Қазақстанда пайда болуы туралы компания бөлек ештеңе айтпады. Компанияның стратегиясы туралы толығырақ — Meta туралы досьеде.
Дереккөздер: Meta — Facebook-тегі «Сіздің алгоритміңіз» бөлімінің іске қосылуы
