Discord жария серверлердегі хаттарды іздеуге ашады
Өзгеріс 63 мыңнан астам серверге әсер етеді, ал еуропалықтар мен британдықтардан айырмашылығы, Қазақстан пайдаланушылары оған әдепкі бойынша қосылады.
Фото: Discord
Discord 27 қазанда ірі жария қауымдастықтардағы хат алмасу кәдімгі веб-іздеуде көрінетінін хабарлады. 16 қарашадан бастап әр осындай сервердің ашық веб-парағы пайда болады, онда талқылаулардың автоматты қорытындылары жарияланады. Ал желтоқсанның ортасынан бастап бұл параққа және іздеу нәтижелеріне жария арналардағы жекелеген хаттар шыға бастайды.
Өзгеріс тек Discord Server Discovery каталогындағы серверлерге қатысты. Каталогқа ену үшін қауымдастықта кемі 1000 қатысушы болуы керек, оның жасы сегіз аптадан асуы тиіс. Сонымен қатар белсенділік пен қауіпсіздік талаптарын орындау қажет. Компанияның дерегінше, мұндай сервер 63 мыңнан асады. Олар ойын өту жолдары, фанаттар қауымы, тіл үйрену және тар хоббилер туралы.
Желіге не шығады
Сервер парағына үш түрлі мазмұн шығады. Олар – қауымдастық профиліндегі сипаттама, белсенді талқылаулардың автоматты қорытындылары және жария арналардағы хаттардың өзі. Мәтіннің жанында пайдаланушы аты мен аватары көрсетілмейді. Желтоқсанның ортасына дейін жазылған хаттар қандай баптау болса да жарияланбайды.
Жеке хаттар, топтық чаттар мен жабық серверлер құпия күйінде қалады. Жасөспірімдерді компания мүлде шығарып тастады. Яғни олар кәмелетке толғанша жариялауды қоса алмайды.
Кім және қалай бас тарта алады
Әкімшілер «Сервер баптаулары» → Web Presence бөлімінде қай арналар желіге шығатынын таңдайды немесе бәрін бірден өшіреді. Ештеңе өзгертпесе, жария арналар қосулы қалады. Веб-парақтан толық бас тарту үшін серверді каталогтан шығарып, қарапайым Community Server-ге ауыстыру керек.
Қатысушылар өз хаттарын «Пайдаланушы баптаулары» → «Деректер және құпиялылық» бөлімінде басқарады. Онда «Discoverable арналардағы хаттарымның мазмұнын веб-парақтарда көрсету» деген ауыстырғыш пайда болды. Ол барлық осындай серверге бірден қолданылады. Баптау қосулы тұрғанда жарияланған хаттар желіде қалады, сондықтан оларды Discord-тың өзінде өшіру керек.
Қорытындыларға бұл ауыстырғыш әсер етпейді. Оларды тек сервер әкімшілері өшіре алады.
Неге Қазақстанда баптау қосулы
ЕО, Ұлыбритания, Канада, Бразилия, Австралия және Оңтүстік Кореяда жергілікті заңдарға байланысты хаттарды жариялау әдепкі бойынша өшірулі. Ол елдердің пайдаланушылары оны өздері қосуы керек. Ал қалған елдердің бәрінде, соның ішінде Қазақстанда да, адам өзі өшірмейінше баптау қосулы тұрады.
Компания бұл өзгерісті интернет-форумдардың бұрынғы пайдасын қайтарумен түсіндіреді, яғни сұрақтарға іздеу арқылы табылатын жауаптар керек. TechCrunch сілтеме жасаған сыншылар басқаша ойлайды. Олардың пікірінше, адамдар жария арналарда бүкіл интернет үшін емес, нақты қауымдастық үшін жазған. Тағы бір алаңдаушылық ашық хат алмасуда жасанды интеллект модельдерін оқытуға қатысты. Discord блогында бұл туралы ештеңе айтылмаған.
Серверлердің алғашқы веб-парақтары 16 қарашада іске қосылады. Хаттарды жариялау біртіндеп жүреді, сондықтан желтоқсан ортасында басталғаннан кейін олар іздеуде бірнеше аптадан соң ғана көрінуі мүмкін.
Дереккөздер: Discord – жария серверлерді іздеуге ашу туралы, TechCrunch – пайдаланушылардың реакциясы туралы
