DeepSeek IPO алдында кемі $12 млрд тартады
Ең көп қаражатты Tencent пен батарея өндірушісі CATL салады, ал сұраныс жоғары болғандықтан раунд 100 млрд юаньға дейін өсуі мүмкін.
Фото: JarTee / Shutterstock
Қытайлық ЖИ-модельдер әзірлеушісі DeepSeek кемі 80 млрд юань (шамамен 5,4 трлн теңге), яғни шамамен $12 млрд көлеміндегі раундты жабуға жақын. Бұл туралы 6 қазанда Bloomberg дереккөздерге сілтеме жасап хабарлады. Ең ірі инвесторлар — интернет алыбы Tencent пен аккумулятор өндірушісі CATL.
Компания алғашында 50 млрд юань (шамамен 3,4 трлн теңге) жинауды көздеген. Алайда инвестиция салғысы келетіндер көп болып шықты. Сондықтан сома 100 млрд юаньға (шамамен 6,8 трлн теңге) жақындауы мүмкін.
Бір жылдағы екінші ірі раунд
Бұл DeepSeek-тің 2026 жылғы екінші ірі қаржы тартуы. Алдыңғы раундта компания $52–59 млрд бағамен шамамен 50 млрд юань жинаған. Сонда негізін қалаушы Лян Вэньфэн өз қалтасынан шамамен 20 млрд юань (шамамен 1,4 трлн теңге) салды, Tencent — шамамен 10 млрд, CATL шамамен 5 млрд юань құйды. Инвесторлар қатарында JD.com, NetEase және Қытайдың ЖИ-ге инвестиция салатын мемлекеттік қоры да болды.
Жаңа раундтағы компания бағасын Bloomberg дереккөздері атамады.
Биржаға бет алды
DeepSeek жаңа қаражатты 2027 жылдың басында күтілетін IPO алдында жинап жатыр. Орналастыруды ұйымдастырушы ретінде компания CITIC Securities-ті таңдады. Акциялар технологиялық компанияларға арналған Шанхайдағы STAR Market алаңында пайда болуы мүмкін. Орналастырудың мерзімі, бағасы мен көлемі әзірге белгісіз.
DeepSeek Лян Вэньфэн құрған High-Flyer сандық хедж-қорынан өсіп шықты. Компанияға әлемдік атақты 2025 жылдың басында шыққан ашық R1 моделі әкелді. Ол америкалық модельдерге әлдеқайда аз шығынмен жақындап қалды. 2026 жылы DeepSeek V4 модельдерін шығарды.
Дереккөздер: The Next Web — DeepSeek раунды туралы Bloomberg деректерінің мазмұны, Techmeme — Bloomberg дерегі бойынша IPO мерзімі
