Porsche $15 млн-ға дейінгі 15 бірегей көлік жасап жатыр
Келесі арнайы нұсқалар базалық модельден үш еседен астам қымбат болуы мүмкін, марка құлдыраған пайдасын осылай түзетпек.
Фото: Porsche
Porsche бағасы $1,8 млн-нан $15 млн-ға дейінгі дана көліктердің 15 жобасын жүргізіп жатыр. Бұл туралы компанияның өнім және жекелендіру жөніндегі вице-президенті Александр Фабиг айтты. Марка осылайша орташа сату бағасын көтеріп, азайған пайдасын қайтарғысы келеді.
Басты бәс 911 мен жеке тапсырыспен бір данада жасалатын көліктерге тігілген. Фабиг Automotive News басылымына шағын сериялы ұсыныстар шешуші рөл атқаратынын айтты. Ол мұны эксклюзивті тауашаларды табысты бизнеске айналдыратын стратегияның келесі қадамы деп атады.
Мұндай жұмыстың мысалдары бар. Flachbau RS Weissach пакеті бар 2018 жылғы 911 GT2 RS негізінде жасалып, 1978 жылғы Moby Dick жарыс көлігіне ұқсатылды. Компания оның бағасын атаған жоқ. Ал 963 RSP-ді 2025 жылы Роджер Пенскеге Ле-Манға арналған 963 прототипінің негізінде құрастырды.
Сериялық арнайы нұсқалар да қымбаттайды. 911 GT3 S/C $273 мыңнан басталады, бұл кәдімгі Carrera-дан шамамен 95% қымбат. Фабиг әлі тоқтамайтындарын айтады. Оның сөзінше, келешек жобаларда үстеме баға базалық модель құнының 200%-ынан асуы мүмкін.
2027 модельдік жылғы ең арзан 911 АҚШ-та жеткізумен қоса $137 850 тұрады. Демек, мұндай арнайы нұсқа шамамен $413 мың болады, деп есептеді Carscoops. Бұл қазіргі $387 мыңдық 911 GT3 90 F. A. Porsche-ден де қымбат.
Тағы бір бағыт — ескі көліктерді қалпына келтіру. Porsche Carrera GT көлігінің 11 данасын жаңартып, бұл жұмыс үшін $784 мыңға дейін алған. Қазір тағы 16 көлікпен жұмыс істеп жатыр, жалпы кезекте 21 автомобиль тұр.
Дереккөздер: Carscoops — Porsche-нің дана көліктер жоспары туралы
