Жаңа BYD Tang EV: 691 ат күші, 850 км-ге дейін жүріс
Дилерлерге көлік 225 мың юаньнан (шамамен 15,3 млн теңге) ұсынылып отыр, ал премьерасы қарашада Гуанчжоу автосалонында күтіледі.
Фото: Yanzhao Nvsiji / CarNewsChina
Үшінші буын BYD Tang EV электр кроссовері Қытайдағы дилерлерге жете бастады. Көлік бөлек электр платформасына көшті. Қуаты 691 ат күшіне дейін жетеді, CLTC циклі бойынша бір зарядпен 850 км-ге дейін жүреді, екі камералы пневмоаспасы бар. CarNewsChina дерегінше, ресми премьерасы қарашада Гуанчжоу автосалонында өтеді.
BYD бөлшек сауда бағасы мен клиенттерге беру мерзімін әлі жарияламады. Дилерлерге жіберілген құжаттарда сатып алу бағасы көрсетілген. Жүрісі 850 км болатын артқы жетекті Premium нұсқасы 225 мың юань (шамамен 15,3 млн теңге), Flagship 240 мың юань (шамамен 16,4 млн теңге) тұрады. CarNewsChina бұл сатып алушыларға арналған расталған баға емес екенін ескертеді.
Қуаты мен жүрісі
Бұрынғы Tang 2018 жылдан бері іштен жану қозғалтқышы бар көліктермен ортақ архитектурада жасалып келген. Жаңасы тек электромобильдерге арналған платформаға салынды. Артқы жетекті нұсқаға 300 кВт (408 ат күші) мотор қойылған. Толық жетекті нұсқада алдыңғы жақта 215 кВт асинхронды мотор қосылады, сондықтан жалпы қуат 515 кВт (691 ат күші) болады. Екі моторлы көліктің салмағы 2520 кг. Сертификаттау деректері бойынша ол сағатына 250 км-ге дейін жылдамдайды, ал алдыңғы буынның шегі 180 км/сағ болған.
- 88,7 кВт·сағ батарея — CLTC бойынша 730 км-ге дейін (WLTP бойынша шамамен 600 км);
- 105,8 кВт·сағ батарея, артқы жетек — CLTC бойынша 850 км-ге дейін (WLTP бойынша шамамен 700 км);
- 105,8 кВт·сағ батарея, толық жетек — CLTC бойынша 830 км-ге дейін (WLTP бойынша шамамен 680 км).
Батареялар — FinDreams шығаратын литий-темір-фосфат ұяшықты екінші буын Blade. BYD 10%-дан 70%-ға дейін бес минутта, 97%-ға дейін тоғыз минутта зарядтауға уәде береді, бірақ тек белгілі бір жағдайларда.
Өлшемі мен салоны
Кроссовердің ұзындығы 5045 мм, ені 1980 мм, доңғалақ базасы 2950 мм. Бұл бұрынғы көліктен 130 мм ұзын. Салон бес орындық, екінші қатарда аяққа 1000 мм-ден астам орын бар, артқы орындықтардың арқалығы электр жетегімен 130 градусқа дейін шалқаяды. Алдыңғы жақта қос иінтіректі алюминий аспа, артта бес иінтіректі аспа тұр. Бейімделгіш амортизаторлары бар DiSus-A жүйесі қаттылық пен клиренсті реттей алады.
Алдыңғы панельде 30 дюймдік панорамалық экран бар, қосымша ақыға 35,4 дюймдік дисплей жолағы қосылады. Орталық консольде компрессорлы тоңазытқыш орнатылған. Жүксалғыш еденінің астында қосымша бөлік, алдыңғы жақта тағы бір жүксалғыш бар. Жүргізушіге шатырдағы лидары бар DiPilot 300 жүйесі көмектеседі: ол көлікті тас жолда да, қалада да жүргізіп, жүргізушісіз тұраққа қоя алады.
Жаңа буын Tang-тың Қазақстанға келетіні туралы ресми түрде хабарланған жоқ. Қытайда ол BYD модельдерінің жаңару кезеңіне тұспа-тұс келді: сәл бұрын дилерлерге жаңа Seal 07 жетті.
Дереккөздер: CarNewsChina — үшінші буын BYD Tang EV дилерлерде, ҚР Ұлттық банкі — юань бағамы
