«Милан» еурокубоксыз маусымды €24 млн шығынмен жапты
Сол күні клуб басшылығы ауысты: «Миланның» бас директоры болып Массимо Кальвелли тағайындалды.
Фото: Emmanuele Ciancaglini / Getty Images
«Милан» акционерлері 29 қазанда 30 маусымда аяқталған 2025/26 маусымының есебін бекітті. Клубтың түсімі €464,6 млн болды, ал таза шығыны — шамамен €24 млн. Қатарынан екі жыл пайдамен жұмыс істеген клуб енді шығынға батты: 2024/25 маусымын «Милан» €2,9 млн пайдамен аяқтаған еді.
Басты себеп — еурокубоксыз өткен жыл. Football Italia бағалауынша, еуропалық турнирлерге қатыспау клубты €70–80 млн түсімнен айырды. Оның бір бөлігін ғана жабу мүмкін болды: ойыншыларды сату €86 млн пайда әкелді, тағы аздаған қаражатты демеушілік табыстың өсуі берді.
Клуб төрағасы Паоло Скарони бұл нәтижелер «Миланның» бизнес-моделі қиын маусымға төтеп беретінін көрсетті деді. Ол клуб иесі Джерри Кардиналенің рөлін және RedBird қорының инвестициясын бөлек атап өтті. Скаронидің сөзінше, басты басымдық — спорттық бәсекеге қабілеттілік. Сол күні клубтың бас директоры болып Массимо Кальвелли тағайындалды. Төраға бұл шешім «осы бағытты көрсетеді» деді.
Клубты алда ең ірі шығын күтіп тұр. «Милан» мен «Интер» 29 қазанда қазіргі «Джузеппе Меацца» стадионының жанында салынатын жаңа аренаның түпкі жобасын таныстырды. Оның жерін клубтар 2025 жылғы қарашада сатып алған. Скарони құрылысты клуб, жанкүйерлер, қала және бүкіл итальян футболы үшін «түбегейлі өзгеріс әкелетін инвестиция» деп атады. Жоба туралы толығырақ — жаңа «Сан-Сиро» Generali Stadium деп аталады деген жаңалықта.
Дереккөздер: Football Italia — «Миланның» 2025/26 жылғы қаржылық есебі
