Toyota электр Corolla-ны 2028 жылдан Қытайда шығарады
Электр нұсқасын Toyota-ның қытайлық FAW-мен бірлескен кәсіпорны жасайды, ал америкалық баспасөз оның бағасын шамамен $30 мың деп болжайды.
Фото: Toyota / Electrek
Toyota алғаш рет электр Corolla шығарады, оны Қытайда жасайды. Жапонияның Nikkei газетінің мәліметінше, өндіріс 2028 жылы FAW Toyota зауытында басталады. Бұл жапон концерні мен Қытайдың мемлекеттік FAW тобының бірлескен кәсіпорны.
Электромобиль Corolla-ның жаңа буынына кіреді. Сол желіде гибрид пен бензин нұсқасы да қалады. Модельдің тұсаукесері 2027 жылы күтіледі, ал нарыққа ол 2028 модельдік жылдың көлігі ретінде шығады.
Көлік туралы не белгілі
Жаңа Corolla «көп жолды» платформаға қойылған алғашқы Toyota болады. Бір негізге электр, гибрид және бензин қозғалтқышын орнатуға болады. Сырт көрінісі жағынан сериялық көлік Toyota 2025 жылы Japan Mobility Show көрмесінде көрсеткен Corolla Concept-ке ұқсауы тиіс.
Аккумулятор сыйымдылығын Toyota әзірге айтпай отыр. Electrek кем дегенде 250 миль (шамамен 400 км) жүрісті және бір не екі электр моторлы нұсқаларды күтеді. Гибридке жаңа 1,5 литрлік төрт цилиндрлі мотор қойылады, жалпы қуаты шамамен 134 ат күші болады. Car and Driver келтірген Toyota инженерлерінің сөзінше, ол қазіргі Corolla-дан 10–20% үнемдірек.
Toyota бағаны атаған жоқ. Car and Driver бензин нұсқасын шамамен $25 мың, гибридті $27 мың, ал электр және розеткадан зарядталатын гибрид нұсқаларын $30 мың шамасында бағалайды. Электромобиль АҚШ-та сатыла ма, әзірге белгісіз.
Неге Қытай
Corolla әлі де Toyota тарихындағы ең көп сатылған модель. 1966 жылдан бері әлемде 57 миллионнан астам көлік сатылды. Алайда Қытайда концерннің жағдайы мәз емес. Electrek дерегінше, онда Toyota сатылымы 23%-ға төмендеді, бұл қатарынан жетінші ай. Басылым мұны жанармай қымбат кезде бензин көлігі мен гибридке сұраныстың әлсіреуімен байланыстырады.
Toyota басшысы Кодзи Сато тұжырымдаманы таныстырғанда Corolla қандай қозғалтқышпен болса да «бәріне арналған көлік» болып қала беретінін айтқан. Директорлар кеңесінің төрағасы Акио Тоёда NHK-ға берген сұхбатында бұдан да қатаң сөйледі: компания өзгеруге мәжбүр, әйтпесе «аман қала алмайды». Тоёданың отбасылық концернді қалай басқарып, одан қанша табатыны туралы Акио Тоёданың байлығы туралы материалда жаздық.
Электр Corolla-ның Қазақстанға келетіні туралы ресми түрде жарияланған жоқ.
Дереккөздер: Electrek — электр Corolla Қытайда шығарылады
