Ахмет Жұбановтың музыкасы алғаш рет стримингке шығады
Композитордың шөбересі 12 жыл Австрияда тұрған, енді Қазақстанға көшуді жоспарлап отыр.
Фото: e-history.kz
24 қазанда ірі стриминг платформаларының бәрінде Ахмет Жұбановтың скрипка мен фортепианоға арналған шығармалары жазылған альбом шығады. Бұл туындылардың алғашқы заманауи ресми жазбасы. Оны композитордың шөбересі, скрипкашы Жәңгір Жұбанов пен пианист Ерназар Гимарат жазды.
Альбом Құрманғазы атындағы Қазақ ұлттық консерваториясының Үлкен залында жазылды. Жоба қазақ кәсіби музыкасының негізін қалаушылардың бірі Ахмет Жұбановтың 120 жылдығына орайластырылған.
Идея Жәңгір Қазақстанға оралғанда туды. Ол бабасының музыкасы интернетте жоқтың қасы екенін байқаған. «Spotify-ды ашсам, бірде-бір жазба таппадым», деді ол Kursiv Media басылымына. Музыканттар ноталарды өздері іздеп тауып, жаңа аранжировка жасап, материалды жазып шықты.
Альбомның мұқабасында жас Ахмет Жұбановтың суреті тұр. Скрипкашының айтуынша, бұл сурет композитор өміріндегі жаңа кезеңнің басталуын білдіреді. Сонымен қатар өзінің музыкадағы жолын да еске салады. Жәңгір 12 жыл Австрияда тұрған, енді Қазақстанға көшуді жоспарлап отыр.
Альбомның тұсаукесері шығатын күні, 24 қазанда сағат 18:00-де Алматы өнер мұражайының Art Street кеңістігінде өтеді. Концерт бағдарламасында Жұбановтың шығармалары мен Вивальдиден Арво Пяртқа дейінгі классика бар. Кіру тегін, бірақ жоба сайтында алдын ала тіркелу керек.
Дереккөздер: Kursiv Media — альбомның шығуы мен концерт туралы
