«Самұрық-Қазына» $1,5 млрд облигация шығаруға дайындалып жатыр

«Самұрық-Қазына» ұлттық әл-ауқат қоры $1,5 млрд-тық орта мерзімді облигациялар бағдарламасының меморандумын жариялады. Қағаздарды бірнеше биржада қатар орналастыруға болады. Олар — Лондон қор биржасы, Гонконгтың HKEX биржасы, сондай-ақ қазақстандық KASE мен AIX. Алғашқы шығарылымның күні әзірге белгісіз.

Облигациялар сериялап шығады. Әр серия бір не бірнеше траншқа бөлінеді. Кірістілік пен мерзімді қор әр транш үшін бөлек белгілейді. Мөлшерлеме тіркелген, құбылмалы немесе нөлдік болуы мүмкін. Ең төменгі номинал — €100, АҚШ инвесторлары үшін $200. Кейін бағдарлама лимитін $1,5 млрд-тан жоғары көтеруі мүмкін.

Ұйымдастырушылар қатарында Citigroup Global Markets Limited, Guotai Junan Securities (Hong Kong) Limited және Standard Chartered Bank болуы ықтимал. Қор Лондон мен Гонконгтағы листингке өтінімін беріп қойды. Бағдарлама бойынша ол 12 ай ішінде орналаса алады.

Қазіргі ереже бойынша шетелде шығарылым жасағанда әр эмиссияның кемінде 30%-ын KASE немесе AIX арқылы ұсыну керек. Ал 21 қазаннан бастап шетелде шарттар тиімдірек болса немесе жергілікті биржаларда сұраныс болмаса, бұл талапты орындамауға болады.

Ақша портфельдік компанияларды қаржыландыруға, стратегиялық жобаларға және қарызды қайта қаржыландыруға жұмсалады. Қор қаражатты мұнай-газ, көлік, энергетика, тау-кен және телеком салаларындағы еншілес және тәуелді компанияларына бағыттайды. Қыркүйек соңында Қазақстанның Даму банкі де сыртқы қарыз туралы алдын ала келісті. Ол қытай банкінен 2 млрд юаньға дейін, яғни шамамен $300 млн ала алады.

Дереккөздер: Kursiv — «Самұрық-Қазына» $1,5 млрд-қа дейін қарыз алуы мүмкін, Kursiv — Даму банкі қытай банкінен 2 млрд юаньға дейін қарыз алады