Google нөмірді рұқсатсыз барлық аккаунтқа байлап жатыр
Баптауды өшірсеңіз, жаңа байланыстыру тоқтайды, алайда бұрын қосылған нөмірді әр профильден қолмен өшіруге тура келеді.
Фото: Brady Snyder / Android Authority
Android телефон нөмірін өзі растап, құрылғыда кірілген барлық Google аккаунтына байлайды. Пайдаланушыдан бұған нақты рұқсат сұралмайды. Мұны 14 қазанда Android Authority басылымы байқады.
Функция «Телефон нөмірін растау» деп аталады және әдепкі бойынша қосулы тұрады. Белсенді SIM-картаның нөмірі смартфондағы барлық аккаунтқа, соның ішінде қосымша, жұмыс және қосалқы профильдерге түседі. Яғни адам бөлек ұстағысы келген аккаунтқа да жеке нөмірі байланып қалуы мүмкін.
Reddit пайдаланушылары noreply-phone-verification@google.com мекенжайынан нөмірі расталғаны туралы хат алғанын жазып жүр. Android Authority редакциясы мұндай хатты өз поштасынан таппады. Алайда бірнеше қызметкерінің телефонында баптау қосулы болып шықты.
Google мұны жасырмайды. Компания нөмірді растау туралы анықтаманы 2025 жылы жаңартып, әдепкі қосулы режим мен құрылғыдағы барлық аккаунтқа байлау туралы жазған. Сол жерде нөмір байланыс пен аккаунтты қалпына келтіру функциялары жұмыс істеуі үшін мезгіл-мезгіл қайта тексерілетіні де айтылған. Жарияланым шыққан кезде Google Android Authority сұрауына жауап бермеген.
Функцияны телефон баптауларынан өшіруге болады:
- «Баптаулар» ішінен Google бөлімін («Google қызметтері мен баптаулары») ашыңыз;
- «Барлық қызметтер» қойындысына өтіңіз;
- «Құпиялылық және қауіпсіздік» бөлімінен «Телефон нөмірін растау» тармағын таңдаңыз;
- «Телефон нөмірлерін автоматты түрде растау» ауыстырғышын өшіріңіз.
Баптауды өшіру тек жаңа байланыстыруды тоқтатады. Бұрын қосылған нөмірді қолмен өшіру керек. Ол үшін Google аккаунтының «Жеке ақпарат» бетіндегі «Байланыс ақпараты» мен «Телефон» бөліміне кіріп, әр профиль үшін бөлек тазалау қажет.
Кейбір Reddit пайдаланушылары баптау өздігінен қайта қосылатынын айтқан. Бұл пікірлерге бірнеше ай болған, ал Android Authority мәселені қайталай алмады. Функция Google Play қызметтері арқылы жұмыс істейді, сондықтан Қазақстандағы Android-смартфон иелеріне де қатысты.
Дереккөздер: Android Authority — телефон нөмірінің Google аккаунттарына автоматты байлануы туралы, Google анықтамасы — телефон нөмірін растау туралы
