Ahold Delhaize кибершабуылдан кейін жүйелерін өшірді
Ритейлердің 9400-ден астам дүкені бар, аптасына шамамен 60 млн адам сауда жасайды, ал 2024 жылы хакерлер одан 2,2 млн адамның деректерін ұрлаған.
Фото: Ahold Delhaize
Әлемдегі ең ірі азық-түлік ритейлерлерінің бірі, нидерланд-бельгиялық Ahold Delhaize 12 қазанда желісінде киберқауіпсіздік оқиғасы болғанын мойындады. Компания сақтық үшін жүйелерінің бір бөлігін өшірді. Дүкендер жұмыс істеп тұр. Алайда Нидерланд, Бельгия және АҚШ-та сайттар, қосымшалар мен ішкі сервистер дұрыс істемей қалды.
«Ahold Delhaize желісінде қауіпсіздік мәселесі туындады», — делінген компания мәлімдемесінде. Оның мамандары жағдайды бағалап, салдарын жойып жатыр. Нақты не болғанын, құрылғылар шифрланған-шифрланбағанын және клиенттердің деректері зардап шеккенін компания нақтыламайды.
Кімге әсер етті
Нидерландтың NOS телекомпаниясы дерегінше, Нидерландтағы Albert Heijn, Etos және Gall & Gall, Бельгиядағы Delhaize сатып алушылары сайттарды, қосымшаларды және қолдау қызметін пайдалана алмады. АҚШ-та Stop & Shop желісінің қызметкерлері жұмыс кестесі мен еңбекақы парағын аша алмай отырғанын айтты. Food Lion-ның ішкі хатында оқиға IT ақауы деп аталған. Хатты қызметкерлер жариялады. Онда дүкендерге онлайн-тапсырыстарды жинап, беруде қиындық болуы мүмкін екені ескертілген.
Компанияның ауқымы үлкен. Оның Еуропа, АҚШ және Индонезияда 9400-ден астам дүкені, 400 мыңға жуық қызметкері бар. Аптасына шамамен 60 млн адам сауда жасайды. 2024 жылы таза сатылымы $104 млрд-тан асты. Аталған желілерден бөлек, топқа Maxi, Mega Image, Albert, Alfa Beta, Profi, bol маркетплейсі, ал АҚШ-та Giant Food пен Hannaford кіреді.
Екі жылдағы екінші соққы
Ahold Delhaize үшін бұл екінші ірі кибероқиға. 2024 жылғы қарашада INC Ransom тобы компанияның американдық жүйелерінен 2,2 млн-нан астам адамның жеке, қаржылық және медициналық деректерін ұрлаған.
Шабуыл Франциядағы жүздеген супермаркеттің тоңазытқыш жабдығын бұзумен тұспа-тұс келді. Сол кезде Albert Heijn-дегі ақау байқалған еді. Алайда оқиғалардың байланысы әлі расталған жоқ: оны Ahold Delhaize те, француз желілері де айтқан жоқ. Сол шабуыл туралы толығырақ Франциядағы тоңазытқыштар туралы материалда.
Дереккөздер: Ahold Delhaize — оқиға туралы мәлімдеме, BleepingComputer — шабуыл салдары туралы, NOS — Albert Heijn-дегі ақаулар туралы
