Сұраныс әлсіз: Apple iPhone 18 Pro тапсырысын азайтты
Жеткізушілер тек қазанның өзінде 15–20% аз бөлшек шығаруы тиіс, ал дереккөздер iPhone Duo-ға да осындай қысқарту күтеді.
Фото: Apple
Apple бірқатар жеткізушіге iPhone 18 Pro мен iPhone 18 Pro Max бөлшектерін аз шығаруды тапсырды. Бұл туралы Nikkei Asia жеткізу тізбегіндегі бірнеше дереккөзге сілтеме жасап хабарлады. Олардың айтуынша, жаңа модельдер компания күткендей сатылмай жатыр. Басты себеп — қымбаттаған баға.
Басылымның екі дереккөзі қазандағы бөлшек тапсырысы бастапқы жоспардан кемінде 15%-ға қысқарғанын айтады. Топ-менеджер деңгейіндегі тағы бір дереккөз екі модель бойынша тек қазанның өзінде 15–20% қысқарту болғанын жеткізді. «Әрі қарай не боларын білмейміз», — деді ол.
Apple жеткізілімге қыркүйектің басынан-ақ сақтықпен қарай бастаған. Қысқарту барлық мердігерге тиген жоқ, себебі олардың өндіріс мерзімі әртүрлі. Қарашадан бастап жаңа түзету болатын-болмайтыны әзірге белгісіз. Apple Nikkei сұрауына жауап бермеді. Ал материалды қайта жариялаған Reuters деректі өз бетінше тексере алмады.
$100-ға қымбат
iPhone 18 Pro желісі қыркүйекте шықты және Apple-дың Pro модельдері ішіндегі ең қымбаты болды. Кіші нұсқасы АҚШ-та $1199-дан басталады, бұл iPhone 17 Pro-дан $100 қымбат. Бәсекелестер де қымбаттап жатыр. Google Pixel 11-дің бастапқы бағасын $899-ға көтерді, Pixel 10 $799 тұрған. Samsung қазан басында Galaxy S26 желісін $100-дан астам қымбаттатты. Android Authority бұл өсімді жады бағасының көтерілуімен байланыстырады.
Жеткізушілердің бірінің менеджері сұраныстың әлсіздігін тағы бір себеппен түсіндірді: Apple алғаш рет релиздерді бөлді. Бұрын барлық жаңа модель бір мезетте шығатын, ал базалық iPhone 18 тек көктемде келеді. Тағы бір дереккөз бүктелмелі iPhone Duo-ны да «осындай тағдыр» күтуі мүмкін дейді. Яғни сату басталған соң оның да тапсырысы қысқаруы ықтимал.
Сұраныстың төмендеуі Apple түсіміне бірден әсер етпейді. Себебі жоғары баға сатылған құрылғы санының азаюын өтейді. Алғашқы нақты сандар қараша басында белгілі болады, сол кезде Apple компаниясы төртінші қаржы тоқсаны бойынша есеп береді.
Қазақстанда шетелден әкелінген iPhone 18 иелері смартфонды қайтадан тіркей алады. «ҰАТ» АҚ бұл модельдердің IMEI верификациясы техникалық жұмыстарға байланысты уақытша тоқтатылғанын растады. Енді ол imei.gov.kz порталы мен eGov Mobile қосымшасы арқылы қолжетімді.
Дереккөздер: 9to5Mac — тапсырыс қысқаруы туралы Nikkei Asia деректері, Android Authority — iPhone 18 Pro мен бәсекелестердің бағасы, Tengrinews — Қазақстандағы iPhone 18 верификациясы
