GTA 6 бұлттағы алғашқы ойынын тек Xbox береді

Microsoft GTA 6 ойынын сатылым басталған сәттен бұлт арқылы ағынмен ойнатудың эксклюзивті құқығын алды. Ойын 19 қарашада шыққан күннен Xbox Cloud Gaming арқылы іске қосылады, ал басқа бұлттық сервистер оны алмайды. Бұл туралы Xbox басшысы Аша Шарма 6 қазандағы жалпы жиында қызметкерлерге айтты. Ақпаратты The Verge таратты.

Келісім ДК иелеріне жанама жол ашады. GTA 6 тек PS5 және Xbox Series X|S консольдерінде шығады, компьютерге арналған нұсқасы әзірге жоқ. Алайда Xbox бұлты арқылы ойынды ДК-да да ашуға болады. Эксклюзив қанша уақытқа созылатыны айтылмады. Кейін ойын басқа сервистерге де шығуы мүмкін.

Insider Gaming дерегінше, Шарма Xbox-тың GTA 6 бойынша «басқа ешбір платформа иесінде жоқ» келісімі барын айтқан.

Сонымен бірге Xbox жазылым арқылы бұлтта ойнау ережесін өзгертеді. Айлық шектеу енгізіледі:

• Game Pass Ultimate — 15 сағат;
• Game Pass Premium — 10 сағат;
• Game Pass Essential — 5 сағат.

Компания шектеу жазылушылардың тек 4%-на әсер етеді дейді. 2026 жылдың қарашасында Xbox бұлттағы ойынға минуттық төлемді іске қосады. Ал жарнамасы бар тегін нұсқаны Xbox Insiders бағдарламасының қатысушылары сынап жатыр.

Бұл жылдың басты релизі алдында Xbox үшін мықты қадам. Бір күн бұрын PEGI рейтингі ойынның мазмұнын ашып қойды, ал релиз бұрынғыдай 19 қарашаға белгіленген.

Дереккөздер: Kotaku — Xbox-тың GTA 6 эксклюзиві және Game Pass шектеулері, Insider Gaming — Xbox басшысының мәлімдемесі