Боуидің 80 жылдығына Bowie80 жобасы жарияланды

Жобаның ең ірі оқиғасы Боуи әндерін Филип Гласстың музыкасымен ұштастыратын симфониялық шоу болмақ, оның премьерасы 2027 жылдың көктемінде Копенгагенде өтеді.

Фото: Jimmy King

Дэвид Боуидің мұрагерлері 5 қазанда Bowie80 жобасын бастады. Ол 2027 жыл бойы жалғасады. Себебі 2027 жылғы 8 қаңтарда музыкант 80 жасқа толар еді. Бағдарламада АҚШ, Ұлыбритания мен Германиядағы көрмелер, симфониялық концерт, сән брендтерімен бірлескен жобалар және шектеулі мерч топтамалары бар.

Жобаның ең ірі бөлігі Лондондағы Виктория және Альберт мұражайында өтеді. Мұражай Боуи мұрағатындағы заттарды көрсетеді, ал мұрағатта 90 мыңға жуық дүние сақталған. 2027 жылы көрме Данди мен Блэкпулға барады, 2028–2029 жылдары тағы бірнеше қала қосылады.

Дэвид Боуидің алғашқы жылдардағы промо-суреті — Сурет: Brian Ward

Концерт, көрмелер және шоу

Бағдарламадағы ең ерекше жоба BOWIE (breaking) GLASS деп аталады. Бұл симфониялық қойылымда Боуидің әндері Филип Гласстың музыкасымен тоғысады. Оны Schirmer Theatrical пен копенгагендік Østre Gasværk Teater театры дайындап жатыр. Әлемдік премьера 2027 жылдың көктемінде Копенгагенде өтеді.

Қалған оқиғалар бірнеше елге бөлінген:

Кливлендтегі Рок-н-ролл даңқ залы қарашаның ортасынан қаңтарға дейін поп-ап дүкен ашып, жанкүйерлермен кездесу, викторина және көрме өткізеді;
Strange Fascination фотокөрмесі 2027 жылғы ақпанда Нью-Йорк пен Батыс Голливудтағы Morrison Hotel Gallery галереяларында ашылады;
Лондондағы Lightroom-да жүріп жатқан David Bowie: You’re Not Alone иммерсивті шоуы Манчестер мен Брайтонға, кейін Гамбургтегі Port des Lumières-ге көшеді.

Дэвид Боуидің ақ-қара портреті — Сурет: Clive Arrowsmith

Сән және мерч

Nordstrom әмбебап дүкендер желісі Сиэтл, Нью-Йорк және Чикагода тақырыптық дүкендер ашады. Онда шектеулі топтамалар мен Undercover, Marc Jacobs, Paul Smith және AllSaints брендтерімен бірлескен заттар сатылады. Perryscope Productions, Girl Skateboards, Roots of Fight және басқа брендтер де жеке топтама шығарады, олардың бір бөлігі Боуидің ресми онлайн-дүкенінде пайда болады.

Bowie80 биылғы мұрағаттық релиздер легін жалғастырады. Бұған дейін 1965 жылы Led Zeppelin құрылмай тұрып Джимми Пейджбен бірге жазылған Today демосы мен Шел Талми продюсерлік еткен алғашқы жазбалар жинағы шықты. 2027 жылы музыканттың Плейстоу-Гроув, 4 мекенжайындағы бала кезгі үйі қалпына келтіріліп, келушілерге ашылады. Жаңа оқиғалар туралы ұйымдастырушылар bowie80th.com сайтында хабарлайды.

Дереккөздер: NME — Bowie80 бағдарламасы, Bowie80 — жобаның ресми сайты