Швеция мен Чехия ӘЧ-2027-де Ресейге бойкотқа қосылды
Ал Латвия Ресей құрамасының халықаралық турнирлерге оралуына ашық қарсы шығатын елдер тобын жинап жатыр.
Фото: Gettyimages.com
2027 жылғы хоккейден әлем чемпионатында Ресеймен ойнаудан бас тартқан құрама алтауға жетті. Финляндия, Норвегия, Дания мен Латвияға енді Швеция мен Чехия қосылды. Бұл екі ел де Германиядағы турнирде Ресейге қарсы мұзға шықпайды.
Швецияда шешімді федерация басқармасы қабылдады. «”Тре Крунур” алдағы әлем чемпионаттарында Ресеймен ойнамайды», — деді оның басшысы Андерс Ларссон. Чехия федерациясы басқа еуропалық хоккей федерацияларының ұстанымын қолдайтынын хабарлады.
Алғашқы төрт ел ұстанымын ашық жариялап, Халықаралық хоккей федерациясына ресми түрде хабарлаған. Норвегия топтық кезеңнің қалған ойындарын кестеге сай өткізетінін нақтылады. Финляндия федерациясының төрағасы Хейкки Хиетанен Yle-ге берген сұхбатында: «Финляндия Ресеймен ойнамайды», — деді. Дания да шешімін IIHF-ке жеткізді.
Дау 30 қазанда басталды. Сол күні Спорт төрелік соты IIHF-ті Ресей құрамаларын 2026/27 маусымының халықаралық турнирлеріне жіберуге міндеттеді. Барлығы бес турнир туралы сөз болып отыр, солардың бірі — ерлер арасындағы әлем чемпионаты. IIHF шешімге көңілі толмағанын айтты, алайда оны орындайтынын мәлімдеді.
Қысым саяси деңгейде де күшейіп келеді. Латвия сыртқы істер министрі Байба Браже елі Ресей құрамасының халықаралық турнирлерге оралуына ашық қарсы шығатын мемлекеттер тобын белсенді түрде жасақтап жатқанын айтты.
Әлем чемпионаты 13 мамырда Гельзенкирхенде ашылады, қалған ойындар 14–30 мамырда Дюссельдорф пен Мангеймде өтеді. Германия хоккей одағы турнирді өткізуден бас тартуды байыпты нұсқа деп атаған еді. Бұл туралы алғашқы төрт бас тарту жайлы материалда жаздық.
Дереккөздер: Sports.kz — алты федерацияның мәлімдемесі, Sports.kz — Ресейге қарсы коалиция
