My Chemical Romance жаңа альбом жазуға кіріседі
2027 жылы топ концерт бермеуі мүмкін, Уэй жанкүйерлерімен 2028 жылы кездесуге үміттенеді.
Фото: Raymond Ahner / Consequence
My Chemical Romance 2027 жылы жаңа альбом жазумен айналысады. Бұл топтың 2010 жылдан бергі алғашқы толыққанды студиялық жұмысы болмақ. Топтың вокалисі Джерард Уэй бұл туралы 30 қазанда Лос-Анджелестегі Hollywood Bowl концертінде мәлімдеді.
«Келесі жылы пластинка жазғымыз келеді. Сондықтан концерт бермейтін шығармыз», деді Уэй сахнадан. Ол жанкүйерлерімен 2028 жылы қайта кездесуге үміттенетінін де айтты.
Бұл Hollywood Bowl-дағы билеті түгел сатылған бес концерттің төртіншісі еді. Осы кештермен топ The Black Parade Tour гастролін аяқтап жатыр. Сахнаға Уэйге The Used тобынан Берт Маккракен шықты. Олар Three Cheers for Sweet Revenge альбомындағы You Know What They Do to Guys Like Us in Prison әнін бірге орындады. Бұл ән 2005 жылдан бері тірі дауыста айтылмаған.
Уэй жаңа музыка туралы бұрын да ишара жасаған. Бір ай бұрын ол сахнадан: «Тағы ән жазуымыз керек шығар. Өмір ғой, түрлі жағдай болады. Бірақ біз әрдайым тағы бір пластинка шығарғымыз келгенін біліңіздер», деген.
Топтың соңғы студиялық альбомы Danger Days: The True Lives of the Fabulous Killjoys 2010 жылы шыққан. Содан бері My Chemical Romance 2022 жылы The Foundations of Decay синглін ғана және The Black Parade альбомының 20 жылдығына арналған қайта басылымын шығарды. Hollywood Bowl-дағы бесінші концерттен кейін топ 2028 жылға дейін сахнадан кетеді. Рок-музыка туралы басқа жаңалықтар rizz.kz сайтында.
Дереккөздер: Consequence — My Chemical Romance жаңа альбом жазатынын растады
